Home > Comunicaos > Reunión de la Xunta de Personal col Conseyeru

Reunión de la Xunta de Personal col Conseyeru

Ayeri llunes, 23 de mayu, representantes de toles organizaciones de la Xunta de Personal Docente empobinámonos pa la Conseyería de Educación pa tresmitir l’enfadu pola falta d’información sobre asuntos tan importantes como les oposiciones y la reválida de 6º de Primaria. Acabando la mañana recibiónos el Sr. Conseyeru y la información resultante del alcuentru ye ésta:

SOBRE OPOSICIONES

  • L’entamu de la oposición ye’l día 20, pero nun hai una decisión zarrada de cómo se van organizar les pruebes. Baráxense dos opciones:

    • Suspender les actividaes llectives el día 20 nos centros que son sé d’oposición y facer la prueba práctica pela mañana y el teóricu pela tarde. Nos centros que nun son sé de tribunal queda a criteriu de la dirección de los mesmos suspender les actividaes llectives o non en función del númberu de docentes afectaos pol procesu selectivu (opositores y miembros de tribunal).

    • Otra opción que se baraxa ye realizar el prácticu’l día 20 de tarde y siguir el día 21 col desarrollu del tema

  • Los criterios de valoración y corrección van facese públicos tolo más el día 14 de xunu

  • La prueba práctica: Fadránla los tribunales. Los sos conteníos tienen que tar integraos nos temarios de la especialidá.

  • Nun acepten la petición d’abrir un periodu de reclamación n’acabando la primer parte de la oposición.

  • La publicación de les sedes de los tribunales va facese a primeros de xunu, depués de conocese les llistes definitives d’almitíos.

SOBRE LA REVÁLIDA DE 6º DE PRIMARIA

  • Les aules afectaes son 420.

  • Les pruebes van realizarse’l 15 de xunu. Sicasí, los centros pueden solicitar faceles otru día, del 13 d’esi mes p’alantre.

  • L’aplicación, revisión y codificación van perfacela los y les tutores de los centros.

  • Una comisión esterna va ser la responsable de la corrección y calificación.

  • La prueba va responder a cuestiones plantegaes en dos cuaderninos. La duración incluyendo los descansos pue allargase trés hores máximo.

  • Nun hai una decisión tomada respecto a si se van pasar los cuestionarios de contestu a centros, families y alumnáu.

  • Queda al arbitriu de cada centru la decisión de facer la prueba otru día distintu al alumnáu que nun asista’l día oficial de celebración .

Esta entrada tamién se puede consultar en: Castellanu