Retayos revistíos d’inclusión educativa

RETAYOS REVISTÍOS D’INCLUSIÓN EDUCATIVA

Na Circular d’Entamu de Cursu 2018-2019 inclúyese un nuevu apartáu que regula l’horariu del profesoráu de les especialidaes de Pedagoxía Terapéutica y d’Audición y Llinguaxe. Nuna Comunidá ensin Decretu d’Atención a la Diversidá, l’autonomía pedagóxica del personal especialista d’AL y PT tarázase a golpe de circular, faciendo de menos el criteriu profesional de quien trabayen directamente col alumnáu. La planificación de los apoyos tocantes a tiempos y espacios queda llindada al establecese “con calter xeneral” la docencia individual a cinco hores selmanales, a nun ser naquellos casos en que, escepcionalmente, la Conseyería d’Educación y Cultura autorizara un apoyu intensivu. La minuciosa composición de los horarios de PT y AL faise teniendo en cuenta múltiples factores de calter personal (como’l perfil sensorial, ente otros) y ambiental (númberu total d’alumnáu del centru, ratios, calidá de la convivencia, cohesión del grupu de referencia, nivel de formación o especialización de tol profesoráu en metodoloxíes que fomenten la inclusión, y en metodoloxíes específiques según la diversidá funcional presente nes aules,…)  too ello coles mires d’organizar la rempuesta educativa que meyor adapte les condiciones del entornu a les característiques individuales, pa que tol alumnáu puea participar n’igualdá de condiciones nel procesu d’enseñanza-aprendizaje.

Ensin dulda, les nueves instrucciones son alarmantes: venti de les venticinco hores que componen l’horariu llectivu de la Educación Infantil y Primaria “van asignase a l’atención en grupu pequeñu o a la docencia compartida, fomentando gradualmente esta última opción”. Suena a inclusión, pero nun lo ye. Per un llau, equipárense les especialidaes de Pedagoxía Terapéutica y Audición y Llinguaxe como si la intervención de dambos profesionales tuviera les mesmes característiques y pudiera llevase a cabu siempres nes condiciones de grupu pequeñu o docencia, la inclusión nun ye eso. Per otru llau, nel momentu que, dende unu de los primeros párrafos del mesmu apartáu, se contempla’l sofitu en grupu dientro o fuera l’aula, calteniendo la posibilidá de sacar al alumnáu de l’aula de referencia, desatápase la estafa: claro que podemos dixebrar al alumnáu, siempres y cuando lo faiga acompañáu d’otres neñes o otros neños que tamién tean en posesión del pertinente “salvoconductu” (lléase “etiquetáu” o “diagnósticu”). D’esta manera, aumentando’l númberu d’alumnos y alumnes por cada sesión/hora, rentabilícense al máximu los recursos personales. Una vegada más, l’Alministración impón el criteriu económicu en perxuiciu de la calidá, de la equidá y de la inclusión educatives. De sobra saben los nuesos responsables políticos, que la docencia compartida, onde la responsabilidá paecen encamentá-yla puramente al profesoráu de PT y AL, esixe hores y hores de coordinación col restu’l profesoráu d’otres especialidaes, pa poder iguar una programación basada nun diseñu universal que dea una inclusión verdadera, y non esos “trampantoxos”, de sobra conocíos, nos que docentes y discentes namás comparten l’espaciu físicu de l’aula. Nun podemos engañar a les families con una pátina de progresu basada na” palabrería” cola que tán vaciando de conteníu’l términu “inclusión”.

Dende SUATEA  esiximos les midíes realmente necesaries pa ufiertar una Atención a la Diversidá de calidá:

•  Amenorgar la ratio profesoráu/alumnáu.
• Apurrir los recursos personales colos perfiles profesionales necesarios pa llevar a cabu docencies compartíes en toles unidaes qu’asina lo precisen.
• Retirar darréu les condiciones impuestes al personal especialista en Pedagoxía Terapéutica y Audición y Llinguaxe pa la ellaboración d’horarios na Circular d’Entamu de Cursu 2018-2019 pa los centros docentes públicos, respetando l’autonomía pedagóxica y el criteriu profesional del personal de los Departamentos y de les Unidaes d’Orientación pa decidir el repartu horariu más afayadizu.

Uviéu 10 de setiembre de 2018

Secretariáu de SUATEA