Home > Aición sindical > Restituyan a 18 les hores lectives del profesoráu de los centros públicos de secundaria

Restituyan a 18 les hores lectives del profesoráu de los centros públicos de secundaria

Conseyería d’Educación Asturiana:
Restituyan a 18 les hores lectives del profesoráu de los centros públicos d’Educación Secundaria, Enseñances de Réxime Especial y de Persones Adultes

SUATEA considera que la xornada de 20 hores llectives; impuesta pola Conseyería d’Educación al profesoráu de los centros públicos d’Educación Secundaria, Enseñances de Réxime Especial y de Persones Adultes; ta suponiendo un grave perxuiciu pal sistema públicu educativu en tolos sentíos.

En xunetu de 2012, la Conseyería d’Educación modificó la xornada d’esti profesoráu pa elevar, de 18 a 20, el númberu d’hores llectives, siguiendo’l mandáu del Gobiernu central. Al contrario que n’otres Comunidaes, que pa contrarrestar esti efectu, baxaron en 2 les hores complementaries, n’Asturies mantuviéronse les mesmes, xubiendo de 25 a 27 les hores de permanencia obligatoria nel centru

Anque n’aquel momentu la Conseyera d’Educación Ana González ampararóse na obligatoriedá de cumplir col Real Decreto-Llei 14/2012, de 20 d’abril, que pon midíes de retayu nel ámbitu educativu, SUATEA propunxo entós considerar como hores llectives les hores de guardia como taben faciendo n’otres CCAA.. Sicasí, la Conseyería refugó d’entrada ensin nengún argumentu creíble esta propuesta. Evidentemente, el motivu nun yera otru que l’económicu. Esa midida dexó a la Conseyería menguar la plantiya docente empiorando asina les condiciones llaborales del profesoráu, aumentando’l númberu de grupos y d’alumnáu al qu’atender y aforrándo-y al Gobierno millones d’euros.

Nesti escenariu, el profesoráu qu’imparte docencia nestes enseñances (ESO, Bachilleratu, FP, EOI, Centros d’Adultos, Escueles d’Arte, Conservatorios…) vese desbordáu pol desproporcionáu aumentu de la so xornada llectiva y d’actividaes complementaries. Daqué que, xunta la descomanada cantidá de xera burocrática y alministrativa que se-y foi imponiendo al profesoráu nos últimos tiempos, torga enforma la preparación de les clases y la ellaboración y evaluación de les actividaes que tien de facer l’alumnáu, asina como la propia formación del profesoráu.

D’otru llau, la midida contribuyó a aumentar la precariedá ente’l profesoráu que vio tresformaes cientos de places a xornada completa en medies xornaes, pesie a que, nesi periodu, hubo cientos de xubilaciones.

Pero’l dañu más importante sufriólu, ensin dulda, l’alumnáu d’esos niveles educativos que, por cuenta de la sobrecarga a que se ve sometíu’l profesoráu, nun puede ser atendíu con tola dedicación que sería deseable. Esta medría de la xornada llectiva traduzse nuna menor capacidá pa dar respuesta a toles dificultaes que l’alumnáu presenta nel so procesu d’aprendizaxe y una menor posibilidá d’atender a la diversidá y a les situaciones de dificultá de tou tipu que presenta cada vez más alumnáu.

Por too ello, SUATEA vese obligáu a esixir al nuevu gobiernu de Asturies y en particular a la nueva Conseyería d’Educación, que modifique l’actual normativa que regula la xornada llaboral del profesoráu p’afayala a les condiciones esistentes enantes de los retayos y de l’aplicación del RDL 14/2012 y qu’asina lo espeye nes Instrucciones d’Aniciu de Cursu. Nun ye aceptable qu’esta normativa siga a valir otru cursu más, polo qu’ha modificase agora que se ta planificando’l cursu 2015/16.

Ye’l momentu de tomar decisiones de cara al próximu cursu que valgan p’ameyorar les condiciones de trabayu y escolarización del alumnáu y apostar realmente por una Escuela Pública Asturiana de calidá.

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743