Home > Comunicaos > Rempuesta de SUATEA a la comparecencia’l Conseyeru Educación

Rempuesta de SUATEA a la comparecencia’l Conseyeru Educación

SUATEA amuesa la so preocupación pol anunciu de revisión de la rede de centros docentes y la falta de sensibilidá coles denuncies del profesoráu asturianu.

Na comparecencia nel parlamentu asturianu, el Conseyeru d’Educación obvió los problemes que tien el sistema educativu asturianu, como son la precariedá y la inestabilidá de les plantiyes, con más de la cuarta parte de docentes interinos -de los que más de 1000 tán trabayando a media xornada-, l’avieyamientu del profesoráu, la sobrecarga de trabayu nos centros educativos, o l’incrementu de llabores nes escueles y nos institutos con cada vez menos personal pa poder facelos.
Sobre l’aplicación de la LOMCE, el Conseyeru nun plantega refugar la llei de frente nin respuende a los graves problemes que van tener los centros educativos a los que se-yos esixe aplicar una llei con fecha de caducidá. El trabayu burocráticu que lleva l’aplicación apurada d’esta llei ta afogando al profesoráu y quitando de desendolcar una atención amañosa al alumnáu. Tampoco nun fai referencia a que se vayan a refugar les reválides que trai consigo la LOMCE.
Les propuestes continuistes referíes al préstamu de llibros de testu nun miren pol establecimientu necesariu de la gratuidá de tol material escolar na rede educativa pública, como demanden les families. Paez que s’anecia en caltener el programa sobrecargáu impuestu pola Conseyera anterior y que tantu refugu creó y crea nos centros educativos el tener que trabayar ensin una dotación curiosa de personal pa ello. Tampoco nun se plantega revisar darréu el llamáu “medicamentazu”, imposición de l’anterior Conseyera y claramente refugáu polos docentes.
El Conseyeru nun fai referencia nenguna a meyorar les condiciones llaborales del profesoráu. Sí mencionó los alcuerdos de plantiyes coles organizaciones sindicales: pero estos alcuerdos nun se tán cumpliendo. Falta profesoráu d’apoyu en primaria, nun se conceden les places de profesoráu tutor especialista de primaria nin los apoyos d’infantil, nun s’entamen los desdobles necesarios n’idiomes, en llaboratorios, n’atención a la diversidá. Nun s’atiende pa les demandes de los centros y impónense places con perfil billingüe cola oposición esplícita de los equipos directivos…
Y nun se fai tampoco referencia nenguna a la reducción horaria pal profesoráu mayor de 55 años, como apaez na llei. Nin se diz nada, por supuestu, de la recuperación de les 18 hores llectives pal profesoráu de secundaria, FP o enseñances de réxime especial o la restitución de los horarios anteriores al “decretazu” en primaria ya infantil.
Pero sí se menciona una revisión de la rede de centros. Mieu da qu’esta propuesta pueda traer consecuencies graves pal alumnáu y el profesoráu asturianu. Nun paez que la llinia vaya a ser meyorar l’atención a la zona rural. Vese bien al ñegase a conceder bachilleratu en Zarréu, cuando una pequeña inversión en profesoráu podría dar solución a decenes de families que tienen qu’unviar a los fíos a estudiar fuera d’Asturies.
Si esta ye la llinia,  albidramos qu’esta visión va suponer la fusión de centros- cola mengua del profesoráu- y el consiguiente incrementu del tresporte escolar pal alumnáu.
Yera conveniente que’l Conseyeru tuviera aconceyao primero colos sindicatos representantes del profesoráu, enantes de la comparecencia, como-y pidiéramos reiteradamente, polo menos dende SUATEA, que llamenta fondamente nun poder tresmiti-y en persona estes esmoliciones.

Secretariáu d’Asturies de SUATEA

UVIÉU 17/09/15

Esta entrada tamién se puede consultar en: Castellanu