Refugamos la propuesta de plantiyes pal cursu 2024-25

Refugamos la propuesta de plantiyes pal cursu 2024-25 porque nun respuende a les necesidaes reales

Na mañana de güei miércoles 20 de marzu celebróse la segunda Mesa Sectorial de plantiyes d’Educación pal cursu 2024/2025. Enantes, en dos xuntes técniques tratáronse específicamente les reclamaciones que los sindicatos recibimos de los centros educativos que nun fueron de mano atendíes  pola alministración. D’estes solo 6 s’atendieron.

Esta rala medría de places sobre les primeramente plantegaes na primer mesa de negociación celebrada amuesa con cifres la falta de sensibilidá de la Conseyería d’Educación escontra les demandes de los centros educativos y la preminencia de criterios economicistes. Y ello magar de ser éstos los conocedores de primera mano de les necesidaes del so alumnáu y  del personal indispensable p’atendeles.

Dende SUATEA consideramos esta plantiya orgánica de 9516 docentes claramente insuficiente, pues como tolos cursos va faer necesario contratar a cerca de 2000 interinos/as p’atender gran parte de les necesidaes estructurales amás de les que-yos son propies: les sobreveníes o urxentes.

Con  esta escasa plantiya:

• Nun se reverten los retayos sufiertos a lo llargo de los años, sinón tolo contrario.

• Nun se potencia la Escuela Pública nin na zona rural nin na zona urbana onde compite cola privada que se refuerza presupuestariamente.

• Nun dexa l’amenorgamientu d’hores lectives nel cuerpu de maestros nin l’amenorgamientu lectivu pa mayores de 55 años.

• Nun s’atiende afechiscamente a la diversidá del alumnáu pa promover la equidad.

• Nun se contempla la especificidá cultural y llingüística asturiana dotando la plantiya orgánica con profesoráu especialista nes nueses llingües propies.

• Nun se dexa la estabilización por aciu l’afitamientu nel so puestu de trabayu del personal interino del que s’abusó na so contratación temporal.

• Nun s’aprovecha la baxada de la natalidá pa menguar ratios y caltener o ampliar plantiyes.

• Nun s’atiende debidamente la función  tutorial de los grupos al priorizar cubrir los horarios de cada área con especialistes distintos de la especialidá de Primaria p’amenorgar la contratación de personal, frente a l’acumuladura horaria d’un docente col mesmu grupu.

• Nun se cumplen los alcuerdos de plantiyes suscritos colos sindicatos.

N’Uviéu a 20 de marzu de 2024

El Secretariáu de SUATEA