Recortes nun quinqueniu prietu que nun se pue repetir

TIEMPU DE PAGAR CUENTES. TIEMPU DE COMPROMISOS

Los tisoriazos daos a la Educación entamen nel 2010 y xeneralícense cola aplicación de las midíes impuestes nel Real Decretu-llei 14/2012, de 20 d’abril, de midíes urxentes de racionalización del gastu públicu nel ámbitu educativu aprobáu pol PP. Nel ámbitu asturianu, el PSOE aplicó toles midíes promovíes pol PP como alumno aplicáu, amás d’otres ocurrencies de collecha propia como, por exemplu, recortar les dietes a tol profesoráu qu’itinera ente dellos centros, nun dotar de profesoráu pa docenes de puestos por falta de planificación o aumentar l’horariu de permanencia nel centru perriba de lo afitao nel decretu anterior, siendo Asturies la comunidá onde se da l’horariu más llargu de tol estáu.

Los gráficos qu’apaecen abaxo indiquen la situación de retayos que se dieron n’Asturies ente 2010 y 2014 desglosaos por comunidaes autónomes. Nellos vese a les clares qu’Asturies asítiase nos puestos de cabeza en cásique tolos aspectos analizaos (suma de retayos en centros públicos nesti periodu -7,2%, suma de retayos en centros privaos nesti mesmu periodu -2,9%, evolución de presupuestos de gastu consolidáu n’educación -15,5%, númberu de profesoráu en centros públicos -6,4%).

Debaxo utilizamos el conceptu de RANKING, que-y gusta muncho al PP igual qu’al PSOE y menciónase continuamente na LOMCE pa clasificar a los centros educativo y reflexar el puestu qu’ocupa la Conseyería d’Educación asturiana respecto a los retayos aplicaos de 2010 a 2014 en comparanza colos otros territorios.

El resultáu ye sorprendente, la Conseyería d’Educación asturiana atópase nos puestos de cabeza del ranking, asitiada siempre de la mitada p’arriba y curiosamente onde se produz el recorte menor ye nos centros privaos. A nivel estatal, retayos tan significativos como l’aumentu de les ratios d’alumnáu por aula; la supresión d’unidaes escolares; la conxelación y/o fuerte mengua de las ufiertes d’emplegu; les dificultaes pa l’atención a la diversidá; la mengua de les partíes pa beques; l’aumentu abusivu de les tases universitaries; la reducción de les plantiyes docentes cola destrucción de miles de puestos de trabayu; l’amenorgamientu de recursos destinaos a la formación permanente, a los gastos ordinarios y los d’equipamientos didácticos de los centros educativos; l’incrementu de la carga horaria y la degradación de les condiciones llaborales del profesoráu, etc., tán torgando la educación pública d’una forma alarmante. Una riestra de recortes que mancaron tanto nes condiciones nes que s’atiende al alumnáu y la comunidá educativa como a les condiciones llaborales del profesoráu, que vio como se-y arrampuñaron derechos.

El conxuntu de la enseñanza, y fundamentalmente la educación pública, foi sometida nel periodu 2010-13 a un recorte presupuestariu ensin precedentes de más de siete mil millones d’euros. El balance déxanos un retrocesu de prácticamente nueve años nos presupuestos dedicaos a la Educación, un retayu de más de trenta y cinco mil profesores nes aules de los centros públicos de les enseñances non universitaries, nes que l’alumnáu  xorreció en seiscientes mil nueves matrícules. Solo gracies al esfuerzu del alumnáu y les families y a la profesionalidá del profesoráu, al so compromisu y la so constancia, l’enseñu públicu resistió y aguantó tolos ataques que-y vinieron nos últimos tiempos.

SUATEA contempla con preocupación cómo se centren los problemes de la educación nel profesoráu, dexando fuera d’esti análisis los problemes reales provocaos por tola política de retayos aplicada nos últimos años y la forma de tornalos. Plantegar que’l problema de la educación reside nel profesoráu ye echar la responsabilidá y disviar l’atención de forma malintencionada. Fai falta aumentar el porcentaxe del PIB destináu a educación, n’especial y prioritariamente el destináu a los centros públicos, después de los intensos recules y dificultaes que’l profesoráu y el sistema educativu carecieron estos últimos cursos. Les próximes elecciones xenerales del 20D teníen que valir pa saldar cuentes y esixir compromisos. Queremos treslladar un mensaxe claru a los partíos políticos y al nuevu gobiernu pa que se comprometan cola derogación de los retayos educativos, cola recuperación del gastu públicu educativu y de los derechos llaborales del profesoráu, recortaos enforma nos cursos de la crisis.

Estes son les reivindicaciones de SUATEA pa los partíos políticos que lleguen al nuevu gobiernu

• Retirada de los Decretos 14/2012 y 20/2012 y de les normatives autonómiques de retayos.
• Retirada de la LOMCE.
• Disminución del horariu de docencia directa del profesoráu.
• Emplegu públicu docente abondo, estable y de calidá.
• Sustitución inmediata de les ausencies del profesoráu.
• Por una educación de calidá inclusiva. Disminución de les ratios máximes del alumnáu nes aules. Flexibilización pa desdobles, refuerzos, afondamientos, recuperaciones de materies suspenses y pa l’atención del alumnáu con necesidaes d’atención educatives específiques.
• Desburocratización del trabayu docente y afalar el trabayu del profesoráu cooperativu y n’equipu nos centros.
• Oposición a los modelos de carrera docente xerarquizadora.
• Recuperación salarial y meyores retributives pa tol
  profesoráu.

Secretariáu d’Asturies de SUATEA.
Uviéu, 16 d’avientu de 2015