Home > Comunicaos > Movilización escontra la violencia machista 25 payares

Movilización escontra la violencia machista 25 payares

pasucais 25NEsti miércoles 25 de payares, a les 19 hores, la Plataforma Feminista d’Asturies va facer un Pasucais-Aquelarre na Plaza La Escandalera d’Uviéu, dientro de la celebración del Día Internacional pola non Violencia escontra les Muyeres.

MANIFIESTU: ¿QUIÉN FORON LES BRUXES?

Na Europa d’ente los sieglos XVI y XVII diose ún de los xenocidios más grandes de la historia, que se conoció como “la caza de bruxes”.
A lo llargo d’estos sieglos foron xulgaes y asesinaes cientos de miles de persones pol delitu de bruxería. D’elles, el 80% yeren muyeres.
La historia oficial defendió a lo llargo los años que la quema de bruxes foi consecuencia de los mieos relixosos llantaos nuna sociedá superticiosa dafechu, faciendo que s’agrandara l’estereotipu de la bruxa que conocemos anguaño.
Ensin embargu, dende la segunda metada del Sieglu XX, un garapiellu d’académiques feministes entamaron replantegase la Historia oficialista y analizala dende una perspectiva qu’axuntaba materialismu y xéneru.
Teniendo en cuenta que’l fenómenu de la bruxería desendolcóse nuna dómina de grandes cambeos sociales y políticos, como yera la transición ente’l sistema feudal y el nuevu sistema capitalista que garraba puxu, estes muyeres amosaron que, envede un xenocidiu por cuestiones relixoses, la caza de bruxes foi una persecución política entamada pol Estáu y xustificada espiritualmente pola Ilesia. Les razones poles que l’Estáu anició un feminicidiu tan bultable respuenden a la necesidá de desaniciar de la nueva sociedá trés cuestiones básiques: el conocimientu non científicu que les muyeres practicaron a lo llargo de los sieglos na estaya de la sanación que nun teníen espaciu nel nuevu conocimientu científicu -masculín- entamáu pol sistema capitalista, y que la Ilesia y l’Estáu calificaben como maxa; la eliminación y persecución de los conocimientos femeninos en materia anticonceptiva y d’interrupción del embaranzu que la Ilesia condergaba y que pasaron a tipificase como crime d’Estáu; y pa rematar, la eliminación de la memoria colectiva que les muyeres llabradores más vieyes calteníen de cuando-yos privatizaron la tierra y-yos asesinaron a la so familia nos llevantamientos de los pueblos mediu sieglu enantes.
L’alcordanza de tiempos meyores pa la so clase, facíales subversives a güeyos de los terratenientes, que nun duldaron n’acusales de bruxería cuando nun aceptaben les sos esixencies. Al empar, epardíen el mieu ente la xente llabrador. Los dueños de les tierres dividieron a la xente de los pueblos pa que nun se rebelare y los fixere perder los sos privilexos.
Asina, el sistema capitalista y la Ilesia persiguieron y asesinaron a toles muyeres que nun se sometieren al estereotipu patriarcal afitáu de muyer casada y ma, y a toles muyeres que se rebelaron escontra la nueva clase que les condergaba a la probeza.
Güei, como entós, les muyeres que nun aceptamos les normes, somos perseguíes y, mui bien de veces, asesinaes.
Poro, les muyeres rescatamos l’alcordanza de toles muyeres aquelles que nun aceptaron el llugar que’l sistema capitalista y patriarcal-yos tenía acutáu. Toles muyeres a les que l’Estáu y la Ilesia en santa comunión asesinaron porque la so existencia yera peligrosa y subversiva pal nuevu orde social establecíu.
Entós, les feministes de güei, les muyeres que nun respetamos el sitiu nel que nos quier poner el capitalismu y el patriarcáu, somos les nietes de toles bruxes que nun pudieron, que nun pudisteis meter al fueu.

Unidades didácticas de Infantil y Primaria, Secundaria, Bachillerato y EPA (a través de ISSUU)

Unidades didácticas de Infantil y Primaria, Secundaria, Bachillerato y EPA (descarga directa PDF (10 Mb))

 

Esta entrada tamién se puede consultar en: Castellanu