Protección de datos nes oposiciones

Esta entrada está disponible en: Castellano (Castellanu)

Nes xuntes celebraes en febreru sobro les bases de la convocatoria d’oposiciones, la Organización Sindical SUATEA presentó una serie d’enmiendes ente les que se  proponía que, garantizando’l principiu de tresparencia y publicidá,  se caltuviéra’l derechu a la protección de datos, a la intimidá y privacidá de los aspirantes per aciu l’establecimientu d’un sistema de claves personales o similar pa acceder a los datos, baremu y notes de tolos candidatos de la so especialidá.

El próximu 25 de mayu de 2018 va tar n’usu el Reglamentu (UE) 2016/679 del Parlamentu Européu y del Conseyu, de 27 d’abril de 2016, relativu a la protección de les persones físiques no que cinca al tratamientu de datos personales y a la llibre circulación d’estos datos, aprobáu pola Unión Europea’l 25 de mayu de 2016, lo que xustifica tovía  más el pidimientu que se realizara dende esta Organización Sindical.

Amás, nel añu 2015, l’Axencia Española de Protección de Datos yá emitió un  informe relativu a la solicitú plantegada por un ciudadanu onde resuelve que, según la lexislación n’usu  en materia de protección de datos, el DNI tien abondu valor, por sí solu, p’acreditar la identidá de les persones.

Por too ello, presentamos a la Conseyería d’Educación un informe xurídicu nel que s’afita la nuesa propuesta que consiste n’utilizar un sistema de seudonimización al traviés de claves o d’identificación per mediu del númberu del Documentu Nacional d’Identidá, ensin incorporar los datos del nome y apellíos de los candidatos.

L’Alministración, como responsable del tratamientu de los datos, tien d’aplicar de forma efectiva los principios de protección de datos col envís de cumplir los requisitos normativos y protexer los derechos de los interesaos.

Uviéu, 10 de mayu 2018.

Print Friendly, PDF & Email

Esta entrada está disponible en: Castellano (Castellanu)