Propuestes y preguntes de SUATEA sobre les Oposiciones 2015

Esti vienres 13 de marzu por fin la Conseyería d’Educación tien a bien aconceyar coles organizaciones sindicales pa informar del procesu d’oposiciones al Cuerpu de Mayestros 2015. SUATEA lleva esixendo-y a la Conseyería, dende qu’anunció la so intención de facer efectiva la Ufierta Pública d’Emplegu, un procesu tresparente y xustu.

Ente les midíes que-y solicitamos pa garantizar esta tresparencia y la igualdá d’oportunidaes tán:

• Realización d’un sortéu únicu pa tolos tribunales de la mesma especialidá col envís que los temes a desarrollar sean los mesmos en tolos tribunales.
• Publicación con antelación a les prebes de los criterios de calificación, corrección o valoración de los que se van mandar los miembros de los tribunales pa calificar.
• Convocar una presentación pública y d’obligada presencia coincidente coles feches en procesos d’otres Comunidaes Autónomes col envís d’evitar l’efectu llamada.
• Garantizar l’anonimatu de les prebes. El RD 276/2007 art. 10.1h diz “en aquellas pruebas escritas en las que no se requiera exposición oral por el candidato o lectura ante el tribunal, deberá garantizarse el anonimato de los aspirantes”.
• Nun repartir les places por tribunales. La experiencia de repartos d’estes característiques tal y como sucedió nes oposiciones nel añu 2014 acaba xenerando inxusticies.
• Establecer los mecanismos necesarios de revisión o reclamación al finalizar la primera parte de la oposición (desarrollu del tema y supuestu prácticu). Al ser un procesu eliminatoriu podría xenerase indefensión por parte de los aspirantes en casu d’errores por parte de los tribunales al nun poder continuar col procesu d’oposición.
• Entrega de les programaciones depués de facese públicos los resultaos de la primer preba y únicamente por parte de los aspirantes que sigan nel procesu d’oposición.
• Desaniciar la figura del voluntariu/a pa formar parte de los tribunales.
• Derogar l’actual Alcuerdu d’Interinos. Con esti alcuerdu firmáu ente la Conseyería, ANPE y FETE-UGT, oblígase a la especialización de los docentes torgando la posibilidá d’ampliar perfiles profesionales. Aquelles persones que tean nes llistes de les especialidaes convocaes tán obligaes a presentase en dalguna d’eses especialidaes quedando escluyíes de les llistes d’interinidá en casu de nun facelo y querer presentase a dalguna otra especialidá na que nun tean yá nes llistes.

Asina mesmo, y con vistes a futures convocatories, consideramos necesario abrir un debate sobre la conveniencia de realizar una preba de conocimientos sobre la comunidá autónoma, tal y como se fae en dellos sitios como Andalucía o Extremadura.

SUATEA espera que la conseyería atienda a les duldes que van xurdiendo ente’l colectivu que ta preparando les oposiciones y dea rempuestes clares y ensin ambigüedaes que faciliten la preparación y la igualdá de condiciones.

Programaciones y temarios:

• Númberu de páxines y característiques formales del formatu de la programación.
• Presencia d’arees del currículo LOE dientro del temariu de la especialidá d’Educación Primaria: Educación pa la Ciudadanía; Conocimiento del Mediu.

Baremación:

• Grados: cómo y en qué apartaos se van a recoyer estes titulaciones y los sos expedientes académicos.
• Seminarios de formación y grupos de trabayu: cómo y en qué apartaos se va recoyer esta formación.
• Títulos d’expertu y especialista en llingua asturiana: cómo y en qué apartaos se va recoyer estes titulaciones.