Propuestes de SUATEA a la convocatoria d’oposiciones

Ayeri celebróse na Conseyería una xunta ente l’Alministración y los sindicatos de la Xunta de Personal Docente pa tratar, ente otros puntos, de la próxima convocatoria d’oposiciones al cuerpu de Maestros. Polo xeneral, el borrador de la convocatoria apenes inclúi variaciones al respective de convocatories anteriores.

Llevamos años en que l’Alministración nun aceptó propuestes, xeneralmente escudándose na falta de tiempu pa entamar cambeos pola urxencia en publicarla resolución cola convocatoria.

Anguaño, anque tamién se nos presentó’l borrador aduciendo la urxencia pa publicar en BOPA esta mesma selmana, l’Alministración amosó un nuevu talante y una actitú más dialogante y receptiva a les propuestes que se presentaron.

Dende SUATEA, en base a consultes realizaes a opositores y miembros de tribunales,  fueron 22 les propuestes que s’espunxeron y se presentaron por escritu na citada xunta,  dalgunes de calter xeneral, qu’afecten principalmente al profesoráu interín; y otres más concretes rellacionaes col borrador de convocatoria.

Les propuestes de SUATEA fueron les siguientes:

PROPUESTES XENERALES

Tres la entrada en vigor el 25 de mayu de 2018 del Reglamentu (UE) 2016/679 del Parlamentu Européu y el Conseyu, de 27 d’abril de 2016, relativu a la protección de les persones físiques no que cinca a la protección de datos personales y a la llibre circulación d’estos datos y, por otra parte, l’informe relativu a la protección de datos en procesos selectivos emitíu pola Axencia española de protección de datos, proponemos que les llistes d’aspirantes, baremos y calificaciones incluyan namás’l DNI incompletu. Amás, consideramos imprescindible publicar el baremu dempués de publicaes les calificaciones definitives.

Nes oposiciones de 2018, los aspirantes que se presentaron n’otres Comunidaes (principalmente en Castiella y Llión) llograron xustificante de completar la primer prueba ensin realizar llectura. Sicasí, a los aspirantes que se presenten n’Asturies esíxese-yos realizar la llectura pa caltenese nes llistes d’interinidá. Proponemos que, si l’Alministración caltién la llectura pública de la primer prueba, nun sía obligatorio realizala pa permanecer en llistes.

A los aspirantes que nun llogren siquier un 1.25 en caúna de les partes de la primer prueba del procesu selectivu, penalízase-yos na llista d’interinidá y son calificaos con un”0” nel apartáu de nota. Ye una penalización qu’escarez de sentíu y que perxudica a la xente qu’opta por presentase n’Asturies. Proponemos que se-yos otorgue la nota que-yos correspuenda, seya la que seya.

Nos procesos selectivos de 2018 quedaron más de 50 places ensin cubrir. Entendemos que lo asocedío respuende principalmente a la dificultá de les pruebes práctiques y a les correcciones a la baxa de dellos tribunales. Proponemos que l’Alministración dea instrucciones clares pa que los tribunales propongan pruebes asequibles y equilibraes y que s’esixa que los criterios de valoración y calificación seyan claros y oxetivos.

PROPUESTES AL BORRADOR DE CONVOCATORIA

1. Documentación. Nun se detalla si apurre fotocopia de la documentación nin si tien de tar compulsada. Proponemos que s’afite’l formatu. Per otra parte, nel Anexu A, faise referencia a la entrega de certificaciones, pero nun se diz si tienen de ser orixinales o copies, nin si tienen que tar compulsaes. Proponemos que se modifique’l términu “certificación” por “copia” o “copia compulsada”.
2. Tases. Les tases por derechos d’esame n’Asturies son demasiao altes al respective de la mayoría de CCAA. Proponemos que se contemple la exención en casu de persones en situación de desempléu, de persones con discapacidá acreditada, families numberoses, víctimes de violencia de xéneru, etc. Amás, tuviera de dexase’l pagu al traviés de tarxeta de creitu o débitu.
3. Composición de los tribunales. No rellacionao coles dispenses pa formar parte de los tribunales, proponemos que s’incluyan como causes de exención: tar en situación de  permisu de maternidá o paternidá, adopción o acoyimientu, o de lactancia acumulada; tener concedíu permisu d’amenorgamientu de xornada; riesgu nel embaranzu; permisos por matrimoniu cuando les feches d’esfrute coincidan col procesu selectivu; quien tengan fíu o fía menor de trés años o persones dependientes de primer grau al so cargu; por exercer como vocal titular de tribunal na última convocatoria d’oposiciones. Na mayoría de CCAA recuéyense estes posibilidaes.
4. No referente a les funciones de los órganos de selección, dizse que “van aplicar na so actuación principios d’austeridá y axilidá nel desarrollu de los procesos selectivos”. Proponemos que s’esanicien esos principios, pos los tribunales tienen de trabayar con medios materiales, redolada favorable y el tiempu abondo pa realizar la so función de forma adecuada.
5. Ente les funciones de la Comisión de selección, introduz que tienen de publicar los criterios d’evaluación, de calificación y de penalización de les distintes pruebes nun tiempu non inferior a dos díes. Consideramos que dos díes ye un plazu mui xustu y proponemos que se garantice la publicación con tiempu bastante siquier una selmana,  que dexe que los aspirantes puean realizar el desarrollu de les pruebes conforme a esos criterios ensin vese sometíos a la improvisación.
6. Entamu del concursu-oposición. Nun tamos d’alcuerdu en que l’entamu seya directamente l’esame. Proponemos que se realice actu de presentación común y obligatoriu pa tolos aspirantes de cada especialidá. Nesti actu pueden esclariase duldes sobre criterios de corrección, valoración de les pruebes y el material necesario pa elles (aspeutos publicaos primeramente en Educastur). Amás, va facilitar a los tribunales que tomen les midíes organizativas que consideren necesaries, incluyíes les d’aspirantes con discapacidá. Tamién pue facilitar que s’amenorgue dalgún tribunal si fallen munchos aspirantes al actu de presentación.
7. Tocantes a los motivos que xustifiquen la non comparecencia al llamamientu únicu, inclúyense la hospitalización por motivos d’embaranzu y/o partu puramente. Hai munches causes de fuerza mayor que puen xustificar la non comparecencia, máxime cuando esta circunstancia repercute nes llistes d’interinidá resultantes d’estos procesos selectivos (los firmantes del Alcuerdu d’Interinidá son responsables). Proponemos que s’incluyan como motivos xustificaos otres causes de fuerza mayor y que naide pierda’l so trabayu d’interín/a por tener una enfermedá, problema familiar sobreveníu, etc.
8. Tocantes a la llectura obligatoria de la primera prueba ante’l tribunal, proponemos que los exercicios escritos seyan lleíos y valoraos polos tribunales, salvaguardando l’anonimatu al traviés d’un sistema de pliques. Asturies ye una Comunidá Autónoma bien amenorgada y non puede resalvase que ye fácil que puean conocese dellos aspirantes y miembros del tribunal, lo que diría en contra del principiu d’igualdá que tien de primar en cualquier procesu d’esti tipu. En munchos territorios (Cantabria, Andalucía, La Rioxa, País Vascu, País Valencianu, Castiella la Mancha, etc.) nun se realiza llectura pública pa mantener el de la primer prueba y asina apaez reflexao nes respectives convocatories. El RD 276/2007 establez nel so artículu 10.1h) esta posibilidá: “Naquelles pruebes escrites nes que nun se riquiera la esposición oral pol candidatu o llectura énte’l tribunal, tendrá de garantizase l’anonimatu de los aspirantes”. Suxerimos, amás, que se tenga en cuenta la sentencia de la Sala contenciosu-alministrativa del Tribunal Supremu de 26 de setiembre de 2017 (rec. 1553/2015), que sostién que tien de garantizase l’anonimatu de los aspirantes.
9. En rellación cola prueba práctica (Parte A), proponemos que la prueba práctica se rellacione col currículu vixente de la especialidá y non col temariu. Amás, proponemos qu’haya optatividá y que se propongan siquier dos opciones pa que l’aspirante escueya una. Tampoco consideramos necesario delimitar el tiempu máximu d’esta prueba a dos hores y proponemos que s’amplíe hasta 3 ó 4 hores.
10. Tocantes a la fecha d’entrega de programaciones, proponemos que s’estableza un plazu mínimu de 48 hores dende la publicación de les calificaciones de la primer prueba
11. No que cinca a les unidaes didáctiques incluyíes na programación, consideramos bien ríxido que se propongan un mínimu de dolce unidaes didáctiques, pos non toles materies nin tolos niveles son iguales. Por eso, proponemos que s’incluya una forqueta d’unidaes didáctiques ente 10-15.
12. En rellación a la valoración de la primer prueba, dizse que “namás va ser calculada cuando la puntuación llograda en caúna de les partes seya igual o superior a 1.25”. Esto implica de facto qu’a estes persones se-yos valore con un cero” nes llistes d’aspirantes a interinidá, como yá asocedió nes convocatories de 2014, 2015, 2016 y 2018, lo cual repercute bien negativamente nel baremu d’estes llistes (los firmantes del Alcuerdu d’Interinidá son responsables). Proponemos que se faiga la media de les calificaciones llograes en caúna de les partes de la primer prueba en tolos casos.
13. Proponemos que s’estableza nesti apartáu un plazu de reclamación a les puntuaciones de la primer prueba. Al ser fases eliminatories, un erru por parte del tribunal a la hora de calificar la primer parte puede dexar inxustamente fuera del procesu a la persona aspirante. Na mayoría les Comunidaes dandos díes pa presentar reclamaciones a les notes de la primer prueba.
14. No que cinca a la valoración de la segunda prueba, introducir por primer vegada la ponderación de les puntuaciones: 65% la unidá didáctica y 35% pa la programación. Proponemos que s’esanicie’l párrafu con esta referencia.
15. Nel apartáu II “Formación académica”, proponemos que se considere como méritu les titulaciones de Grau. En dalgunes CCAA tiense en cuenta.
16. N’aplicación de RD 967/2014 sobre homologaciones y correspondencies de titulaciones universitaries, que faen referencia al procedimientu pa la homologación, declaración d’equivalencia de titulación y convalidaciones, y tamién pa determinar la correspondencia a los niveles del marcu español de cualificaciones pa la educación superior (MECES) de los títulos oficiales de les titulaciones anteriores al Plan Bolonia, proponemos una puntuación suplementaria nestes titulaciones conforme al nivel académicu que correspuenda dientro del MECES.
17. Proponemos que se tengan en cuenta los títulos d’Especialista o Espertu en Llingua asturiana como títulos propios de la Universidá d’Uviéu, de la mesma manera que se tienen otros títulos de posgráu.
18. Proponemos que se tenga en cuenta nel baremu la participación en cursos o actividaes de formación en calidá de director/a, coordinador/a, ponente o docente, tal como asocede n’otros territorios.

Uviéu, 12 de febreru de 2019

PDF pal tablón