Home > Centros educativos > Propuesta de Calendariu Escolar pal 2015/16

Propuesta de Calendariu Escolar pal 2015/16

PROPUESTA DE CALENDARIO

SUATEA, el sindicatu mayoritariu n’Asturies y qu’ostenta la presidencia de la Xunta de Personal Docente presentó énte la Comisión Permanente de la Xunta de Personal, na que tán representaos tolos sindicatos d’enseñanza pública, una propuesta de calendariu escolar pal próximu cursu 2015-2016, como yá indicábamos nel nuesu boletín.

La propuesta de SUATEA foi aceptada y asumida pol restu de sindicatos. El llunes 4 celebrábase la preceptiva xunta ente l’Alministración y distintos miembros de la comunidá educativa. Nella tuvieron ausentes los representantes de les asociaciones de madres y padres polo que nun pudo llograse un alcuerdu.

Lo novedoso del calendariu anicia na distribución de los periodos de descansu, yá qu’ente la inmensa mayoría del profesoráu y de les families nun s’entiende que la duración de los trimestres escolares venga determinada polos calendarios de fiestes relixoses o laiques y non por cuestiones pedagóxiques que tienen que ver cola necesidá d’arbitrar descansos ente periodos llectivos con un intervalu regular.

Nos centros educativos una de les quexes que más s’escuchen a la de la planificación de cada cursu ye qu’haya trimestres qu’apenes algamen los dos meses y otros que lleguen a ser de cuatro. Y que dependiendo de cómo cayan les fiestes, danse periodos perllargos ensin descansu na actividá docente o bien descansos mui siguíos qu’entorpecen la bona marcha del cursu. Una de les mayores quexes ye la curtia duración del cursu en 2º de Bachilleratu pola imposición del calendariu de la Universidá y el pocu tiempu ente les PAU de xunu y xunetu, daqué qu’estos díes ta sufriéndose per parte del profesoráu y l’alumnáu d’esi cursu.

Dende SUATEA defendemos un calendariu escolar que respete’l ritmu escolar del alumnáu y que con calter xeneral plantegue un descansu de siquier una selmana tres 6 d’actividá llectiva. Respetando los 175 díes obligatorios y les fiestes marcaes nel calendariu llaboral propúnxose esti novedosu cambéu del calendariu que ye una realidá na mayoría de países de la nuesa redolada.

Ye una propuesta que namás pretende ameyorar el rendimientu del alumnáu y les condiciones nes que se desenvuelve’l procesu d’enseñanza aprendizaxe. Les AMPAs tienen agora la posibilidá de llograr esti pasu escontra felicidá ameyora na xunta que se va celebrar mañana xueves 7 de mayu.

Esta entrada tamién se puede consultar en: Castellanu