Home > Aición sindical > Pronunciamientu asturianu pola paz y los derechos humanos en Colombia

Pronunciamientu asturianu pola paz y los derechos humanos en Colombia

arco-5Les organizaciones d’apoyu del programa Asturianu d’Atención a Víctimes de la Violencia en Colombia, con motivu del día mundial de los derechos humanos, afirmamos que’l conflictu armáu que ximielga a Colombia dende hai más de mediu sieglu precisa d’una igua distinta de la guerra que nos dolce últimos años apurre un saldu apavoriante en víctimes y en daños al estáu de derechu nun país col qu’Asturies tien una rellación especial nel tarrén de la defensa de los derechos humanos.

Nel 2013 siguieron les amenaces y los asesinatos de sindicalistes, opositores al modelu económicu neolliberal y defensores de los derechos humanos, col calter de sistemátiques y impunes, asina como masives nel casu de la violencia sexual contra muyeres y neñes. Los 37 defensores de derechos humanos y sindicalistes asesinaos nel primer semestre d’esti añu súmense a los tres mil sindicalistes asesinaos nos años anteriores, les más de 20 mil personas desapaecíes, miles d’amenazaos, casi seis millones de desplazaos forciaos y una llista de graves violaciones de los derechos humanos que-y merecieron al Estáu colombianu once (11) condenes recientes de la Corte Interamericana de Derechos Humanos y el ser metíu na llista de países n’observación preliminar pola Corte Penal Internacional.

Les más graves violaciones de los derechos humanos siguen ocurriendo nes árees de conflictu armáu y nos territorios ancestrales que les multinacionales minero-enerxétiques quieren arrampuñar col apoyu de los paramilitares y de la fuercia pública a los pueblos indíxenes, a les comunidaes negres y a les families campesines.

Les mayoríes en Colombia, cansaes de la violencia, la impunidá, la esclusión y la inequidá, vienen espresando n’enormes movilizaciones que acompañen el compromisu del gobiernu y de la insurxencia d’usar el diálogu políticu p’acabar la guerra y buscar soluciones que llevanten una paz estable mediante la xusticia social.

Más d’una década de solidariedá con Colombia defendiendo los derechos humanos de los grupos especialmente vulnerables permítennos espresar:

  • El nuestru sofitu a les conversaciones que se faen en La Habana ente’l gobiernu de JUAN MANUEL  SANTOS CALDERON y les FARC-EP, diálogu que ye necesario abrilu tamién al ELN y al EPL.
  • El nuestru apoyu y solidariedá a les miles de víctimes del conflictu social y armáu y la nuestra disposición a collaborar na reconstrucción del texíu social y organizativo, rotos pola confrontación y pol modelu económicu neolliberal impuestu a sangre y fueu.
  • La desixencia al gobiernu de Colombia de garantíes efectives pa l’acción d’oposición política y pa la defensa de los derechos humanos y sindicales, l’esmantelamientu de los grupos paramilitares y de la impunidá estructural.
  • A España y a la U.E. desixímos-yos qu’apoyen la negociación política ente’l Gobiernu y les guerrilles, que mantengan a Colombia dientro de les sos prioridaes en cooperación y que verifiquen l’estáu críticu de los derechos humanos.
  • La nuestra desixencia a les empreses multinacionales qu’operen en Colombia y que se beneficien del terror, de que respeten los derechos llaborales, sindicales, sociales y territoriales.
  • El nuestru apoyu a la continuidá y meyora del Programa Asturianu d’Atención a Víctimes de la violencia en Colombia, ferramienta de protección que sigue siendo necesaria pa los sindicalistes y defensores amenazaos de muerte qu’anecien en que se siga constatando nel tarrén l’estáu de los derechos humanos.

Comisión Asturiana d’Organizaciones d’Apoyu del Programa Asturianu d’Atención a Víctimes de la Violencia en Colombia.

Xixón, 27 de payares/13

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344