Home > Comunicaos > Profesoráu Interino: Avérase la truena

Profesoráu Interino: Avérase la truena

El pasáu 7 de payares celebróse la última Mesa sectorial d’Educación nel Ministeriu d’Educación y Cultura onde, por aplicación del “Alcuerdo para la Mejora del Empleo” robláu’l 29 de marzu por delles Organizaciones Sindicales y el Ministeriu de Facienda, s’axusten los procesos d’estabilización del personal docente.
La base del Alcuerdu supón amenorgar la tasa d’interinidá al 8%. N’Educación, la media de la tasa d’interinidá asítiase en redol al 25% (n’Asturies, un 32%). Amenorgar la tasa d’interinidá al 8% implica que les places ocupaes pol profesoráu interino van ufiertase a concurso-oposición y que quien nun llogre superar estos procesos va ser despidíu, principalmente porque se trata d’estabilizar plantiyes, non de consolidar a les persones qu’ocupen les places. Por ello, ye fundamental qu’estos procesos selectivos sían estraordinarios y que s’executen con un sistema d’ingresu na función docente que dexe que’l profesoráu interino consolide como personal funcionario.
Énte la negativa a unos procesos estraordinarios, la mayoría sindical presente na Mesa sectorial del MECD ta defendiendo un cambéu del sistema d’accesu que dexe que’l profesoráu interino pueda superar esti concursu-oposición. Pa ello, realizáronse, ente otres, estes propuestes:
– Medría del pesu de l’antigüedá na fase de concursu.
– Mayor ponderación de la fase de concursu en comparanza cola oposición.
– Aumentu del númberu de temes a escoyer na fase d’oposición.
– Lo importante: pruebes de la fase d’oposición non eliminatories.
Sicasí, de nada va valir que s’amonte’l pesu de l’antigüedá na fase de concursu, que s’aumente tamién la ponderación de la fase de concursu sobro la d’oposición o qu’haya mayor númberu de temes a escoyer, aspeutos qu’el MECD paez tar dispuestu a recoyer (anque de forma insuficiente), si les distintes pruebes tienen calter eliminatoriu. Que les pruebes nun sían eliminatories ye absolutamente determinante pa que los/es opositores, compensando les notes llograes nes distintes pruebes, puean llegar a la fin de la fase d’oposición y sumar la fase de concursu.
Per otra parte, na Comisión d’Educación del Congresu de los Diputaos, aprobóse esi mesmu, día 7 de payares, xuna PNL de Xuníos Podemos con una enmienda del PSOE. Pidíase, ente otres coses, que les pruebes de la fase d’oposición nun fueren eliminatories y que na fase de concursu se tenga especialmente en cuenta la esperiencia docente.
Magar que la mayoría sindical na Mesa de negociación, que son los lexítimos representantes del profesoráu, y la PNL nel congresu de los diputaos ciscaben pruebes non eliminatories, el Ministeriu anecia en que les distintes pruebes de la fase d’oposición van ser eliminatories alegando que se sofitó esta propuesta na Comisión Xeneral del MECD y les Comunidaes Autónomes, magar que sabemos que la metá de les Comunidaes Autónomes presentes nesa Comisión defendieron que nun fueren eliminatories.
Les Alministraciones educatives incurrieron claramente en fraude de Llei y fueron les responsables de la situación creada al nun ufiertar les vacantes estructurales esistentes. Gran parte del profesoráu interino superó procesos selectivos nel pasáu, pero nun llograron llograr plaza como funcionarios de carrera porque les ufiertes de places fueron escases ya insuficientes. Poro, les Alministraciones educatives tienen de ser capaces d’acometer los cambeos lexislativos necesarios pa reparar la precariedá llaboral causada al profesoráu interino. De lo contrario, va haber un ERE que va afectar a decenes de miles de persones.

Per otra parte, hai que destacar que’l profesoráu interino d’Asturies tien un gran problema añedíu: l’Alcuerdu d’interinidá en vigor. En munches CCAA tienen pactos d’estabilidá o ordenen les llistes por rigorosu orde d’antigüedá (Cantabria, Galicia, Valencia, Andalucía, Cataluña, Baleares, Andalucía). N’Asturies rebarémense les llistes dempués de cada procesu selectivu y tien un pesu bien importante la nota llograda, lo qu’implica la rotación y la posibilidá real de qu’estes persones pierdan el puestu de trabayu.

Si’l Ministeriu nun da respuesta a esta reivindicación clave, esto ye, que les pruebes de la fase d’oposición nun sían eliminatories, vamos dar la respuesta que’l profesoráu interino ta reclamándonos y vamos convocar movilizaciones a lo llargo del cursu en tol Estáu.

Esta entrada tamién se puede consultar en: Castellanu