Home > Eleiciones2018 > Profesoráu interín

Profesoráu interín

5.1. Polos derechos y la estabilidá del profesoráu interín

 

  1. Negociación d’un nuevu alcuerdu d’interinidá que recueya la estabilidá pa tol profesoráu interín hasta’l so accesu definitivu a la condición de funcionariu/a de carrera.
  2. Ellaboración de llistes estables, nes que’l méritu preferencial sía’l tiempu de serviciu nel enseñu públicu, desvenceyaes de les convocatories d’oposiciones. Que s’elimine la obligación de presentase a los procesos selectivos pa caltener el so puestu nes llistes d’aspirantes a interinidá.
  3. Accesu a la xubilación nes mesmes condiciones que’l personal funcionario de carrera (60 años cumplíos y 30 de serviciu).
  4. Equiparación de les condiciones llaborales col personal funcionario de carrera, según el principiu de non discriminación de trabayadores con contratu de duración determinada (Directiva Europea 1999/70/CE de 25 de xunu, anexu cláusula 4ª).
  5. Igualación ente’l personal funcionario interino y el de carrera en temes de permisos y llicencies por maternidá y paternidá, por riesgu nel embaranzu o la lactancia, y también nos permisos, reducción de xornada o escedencies por guarda llegal, etc. Cómputu total del tiempu de llicencia a tolos efeutos (servicios daos, retribuciones, vacaciones y derechos alministrativos).
  6. Contratu y alta na Seguridá Social de les profesores interines que tean de permisu por maternidá cuando-yos correspuenda una vacante o sustitución, ensin arrenunciar al permisu, según la reconocencia de tolos derechos alministrativos. Igual tratamientu pal personal interino qu’esfrute de permisu paternal.
  7. Nos casos nos que surda una incapacidá transitoria sobrevenida dempués de l’axudicación, reserva de la plaza axudicada.
  8. Non a la precariedá llaboral, refugu del usu abusivu de la contratación parcial per parte l’Alministración. Obligatoriedá pa l’Alministración de xustificar caúna de les medies xornaes. Refugu total a les medies xornaes itinerantes.
  9. Dotación pa cubrir toles sustituciones, independientemente la duración, y los apoyos en tolos niveles y programes educativos. Sistema axilosu ya inmediatu pa cubrir sustituciones.
  10. Accesu n’igualdá de condiciones a la formación institucional independientemente de la situación llaboral del demandante.
  11. Reconocimientu alministrativu no que cinca a retribuciones de les funciones desempeñaes pol profesoráu interín (xefatures, tutoríes…).
  12. Que nun se puntúe en nengún baremu’l tiempu trabayáu impartiendo relixón nin en centros privaos o concertaos.
  13. Pidimientu de vacantes per aciu un sistema seguru y fiable, que nun induza a erros que puean espulsar del sistema al profesoráu aspirante a la plaza. Posibilidá de facer los pidimientos tanto telemáticamente como en papel. Axudicación provisional y plazu de reclamaciones enantes de l’axudicación definitiva.

14.Ufierta de toles places qu’esistan. Introducción de la “meyora de puestu” cuando nun s’ufierten toles places na primer convocatoria, garantizando asina l’orde de prelación nes llistes a la hora d’escoyer.

 

5.2. Accesu a la función pública docente

  1. Defendemos l’accesu a la docencia por concursu de méritos. Sicasí, énte los imperativos llegales vixentes, esiximos la derogación del modelu actual d’accesu (Reales Decretos 276/07 y 84/18) y la negociación d’un nuevu sistema que contemple l’accesu estremáu pal profesoráu interín, ensin pruebes eliminatories, onde la esperiencia docente tenga calter primordial.
  2. Refugamos l’Alcuerdu pa la Meyora del Empléu Públicu, de 29 de marzu de 2017. Pa reducir la interinidá na educación pública, esiximos que naide pierda’l so puestu de trabayu y que s’adopten midíes d’afitamientu llaboral como funcionaries y funcionarios de carrera pal profesoráu interín. Pa ello, reivindicamos como midida estraordinaria’l desarrollu lexislativu del artículu 61.6 del EBEP con un accesu a la función docente per aciu d’un concursu de méritos.
  3. Oponémonos a cualquier intentu de llaboralización del colectivu interín, por suponer una merma evidente de les sos garantíes llaborales y la introducción de métodos empresariales de contratación y xestión de les plantiyes docentes en perxuiciu de la escuela pública.
  4. No que cinca’l concursu-oposición, valoración prioritaria na fase de concursu de la esperiencia docente na enseñanza pública, considerándola na so totalidá. Oposición ensin pruebes eliminatories, onde la valoración de les estratexes pedagóxiques tenga mayor consideranza que les pruebes memorístiques.
  5. Temarios reducíos, actualizaos y adautaos a la práctica docente Pruebes práctiques basaes en criterios oxetivos y con posibilidá d’escoyer ente delles opciones.
  6. Convalidación de la fase de práctiques con un cursu d’esperiencia docente.
  7. Negociación real de les bases de les convocatories d’oposiciones coles Organizaciones Sindicales.
  8. Máximes garantíes d’oxetividá y tresparencia en tol procesu selectivu. Derechu efectivu a revisión y reclamación dempués de publicaes les notes de cada prueba. Criterios de calificación públicos y con antelación bastante. Garantizar l’anonimatu nes pruebes escrites per aciu d’un sistema de pliques. Arbitrar midíes de protección de datos personales y notes llograes poles persones aspirantes.
  9. Tribunales: toles persones que los formen van ser escoyíes por sortéu ente’l profesoráu de la especialidá convocada. Ampliar les causes d’exención por conciliación familiar pa formar parte de los tribunales. Desarrollu del so llabor en condiciones dignes. Reconocencia del serviciu fechu polos miembros de los tribunales a nivel alministrativu, retributivu y de vacaciones.
  10. Presentación de documentos pal baremu dempués de superada la fase d’oposición. Archivu informatizáu de documentación pa entainar la so tramitación, garantizando la privacidá de los datos. Esti archivu informatizáu ha de tar disponible pa tolos procesos alministrativos.

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339