Home > Comunicaos > Profesoráu Técnicu de FP

Profesoráu Técnicu de FP

SUATEA Y LA CONFEDERACIÓN DE STEs-i SIGUEN APURANDO UNA SOLUCIÓN AL MINISTERIU D’EDUCACIÓN SOBRE’L PROFESORÁU TÉCNICU DE FP
La solución sólo puede pasar pola integración de tol profesoráu afectáu nel mesmu cuerpu de profesores, ensin dexar a naide atrás. La Disposición adicional undécima de la LOMLOE declara’l cuerpu de profesores técnicos de FP como cuerpu a escastar. Cuando va cumplise un mes de la entrada en vigor d’esta llei, nada sabemos tovía sobre los planes del Ministeriu al respective d’esti profesoráu. El pidimientu cursáu pola totalidá d’organizaciones sindicales con presencia estatal, con representación na Mesa de Negociación del Personal Docente non Universitariu, el pasáu 19 de xineru pa que se convocara una xunta de dicha mesa, pa encetar -ente otros- esti asuntu, por fin tuvo contestación per parte del Ministeriu, que convocó esta xunta pal próximu 24 de febreru.
La Confederación de STEs-i, na que s’atopa integrada SUATEA, va presentar na citada Mesa la siguiente propuesta:
– Naide puede salir perxudicáu pola aplicación d’esta nueva llei orgánica. A la totalidá del profesoráu téunicu de Formación Profesional tienen de se-y reconocíos los sos derechos, de manera que les sos condiciones llaborales sían iguales coles del profesoráu de Secundaria, con quien comparte llugar de trabayu, horarios, alumnáu y demás responsabilidaes.
– La adscripción direuta al cuerpu de Profesores de Secundaria de tolos docentes de Formación Profesional a la fecha de publicación de la llei.
– Que se caltengan les titulaciones equivalentes a efectos de docencia del RD 276/2007.
– Revisar y actualizar con nueves titulaciones el RD 276/2007, la mayoría de les especialidaes puen impartir docencia ente trés y ocho families profesionales.
– Retroalimentar la FP con xente especializada. Un gran númberu de persones tán formándose como Téunicos Superiores de FP pa impartir docencia.
– La figura de profesor especialista tien de ser daqué esceicional, teniendo de revisase, y non una forma de contratación que permita aforrar dineru a les alministraciones, a cuenta de les condiciones llaborales del profesoráu y de la calidá d’enseñanza.
Ye menester aporfiar en que ta en xuegu, per un sitiu, el futuru y la calidá de la Formación Profesional, y per otru, les condiciones llaborales y el puestu de trabayu de miles de profesores téunicos que son, según los datos que van apurriendo les Comunidaes Autónomes, la mayor parte de los qu’anguaño imparten esti tipu d’enseñanza.
Nun se trata, como repitió en más d’una ocasión, la Direutora Xeneral de Formación Profesional del Ministeriu d’Educación, Clara Sanz, d’un “pequenu porcentaxe del profesoráu téunicu” el que podría vese perxudicáu (alredor de 2.000 según les sos estimaciones), si non de la mayoría d’esti cuerpu integráu por más de 30.000 docentes.

Secretariáu de la Confederación de STEs-i.
22 de febreru de 2021.

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348