SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
PASÁU Y PRESENTE
En 1886 la clas trabayadora foi masacrada por reivindicar la xornada de 8 hores. Na so alcordanza y na de toles persones que lluchen por una sociedá más xusta y igualitaria festexamos el Primeru de Mayu. Dende entós hasta güei conocimos delles dómines y na actualidá tenemos poco que festexar.
Queremos manifestar de mano’l nuestru recuerdu y respetu poles víctimes d’esta pandemia que nos afara, amás d’amosar el nuestru apoyu y solidaridá con tola clas trabayadora, munches y munchos na más absoluta precariedá, que foi determinante na llucha contra la enfermedá y nel caltenimientu de tolos servicios esenciales.
El 30 de xineru pasáu salíemos a la cai pola garantía y defensa del Sistema Públicu de Pensiones, Sanidá, Ayuda en Casa, Servicios Sociales y Escuela Pública. Esixíemos garantizar toos estos servicios y la vuelta a manes públiques de tolo privatizao.
La realidá del presente vuelve afitar les nuestres esixencies: nun podemos consentir que sigan faciendo, cola nuestra salú y les nuestres necesidaes y cuidaos, un negociu priváu.
Que nuna situación d’emerxencia sanitaria como na que nos atopamos les instituciones qu’integren los estaos nun foren quién a activar los recursos necesarios pa fabricar y suministrar daqué tan básico como bates, mázcares y demás material amuesa’l nivel tan insoportable d’estroza al que lleguemos pola socesiva aplicación de polítiques neolliberales que priorizaron el beneficiu económicu d’unos pocos percima de les necesidaes vitales de les persones. La sociedá civil tien que reaccionar y ser intolerante dafechu con estes práctiques, impidiendo la mercantilización de servicios que tienen de ser namás de dominiu públicu.
RENTA BÁSICA
La clas trabayadora foi castigada en crisis socesives pol desempléu y la precariedá, y tolos datos apunten a que s’avera una coxuntura económica difícil.
Nun se pue almitir que la situación pela que tamos pasando la tengamos que pagar única y esclusivamente los de siempre. Les persones que nun tengan recursos nun puen quedar escaecíes y, polo menos, tienen que tener garantizaos un techu y unos ingresos mínimos que-yos dexen alimentase y cubrir les sos necesidaes básiques, polo que ye absolutamente necesaria la puesta en marcha d’una Renta Básica ensin la menor demoranza.
DEPÚES DE LA CUARENTENA
Quiciabes munches persones s’entruguen cómo va ser el día depués del confinamientu. Independientemente de que seya más o menos espaciáu nel tiempu, la sociedá civil nun pue aguantar que les coses sigan igual, como si nun pasare nada. Pasa agora y pasó a lo llargo de décades, y lo que nestos momentos asocede, agudizao pola pandemia, ye una señal del dexar facer, de dexar qu’otres y otros, una minoría, decida por toes y toos. Ye hora de camudar esa dinámica, ye hora de movilizase y asumir les nuestres responsabilidaes como clas trabayadora.
La estroza de les instituciones resulta alarmante frente a les presiones de los poderes económicos y los intereses del capital. Ye menester sumar fuercies pa movilizanos y establecer estratexes pa entamar un frente común en defensa de tolos servicios públicos, trabayando na erradicación de les práctiques irracionales d’un sistema que prioriza la economía sobre la vida.
El capitalismu tien que dexar de campar a los sos deleres nesti espeyismu de sistema democráticu onde vivimos, onde la clas trabayadora nun apara de perder terrén y onde cada vez hai más persones que viven na esclusión, con escases o nules posibilidaes de que les sos vides ameyoren. Tenemos que tar preparaos, tenemos que rebelanos.
Dende equí facemos un llamamientu pa que cuando esti confinamientu remate volvamos a les cais a defender una salida social pa tola clas trabayadora frente a los distintos poderes económicos y una estrema derecha que siempre se beneficia de les dómines de mieu y inseguranza. Esta salida nun pue escaecer l’estáu d’emerxencia climática y ambiental na que nos atopamos y en nengún casu pue ser a costa de siguir sobreesplotando y contaminando’l planeta.
Ye menester otru sistema y les clases trabayadores tienen que participar activamente na so construcción, texendo redes de solidaridá y autoxestión pa lluchar contra quien s’arriquecen cola nuestra salú y contra quien nos quieren instalaos na precariedá pa mayor arriquecimientu a cuenta del nuestru trabayu.
¡Viva’l 1.u de Mayu! ¡Viva la clas trabayadora!
Esta entrada está disponible en: Castellano (Castellanu)
