Primer Mesa de negociación de plantiyes pal cursu 2022-23

Esta entrada está disponible en: Castellano (Castellanu)

Na mañana de güei, miércoles 2 de marzu, celebróse una xunta telemática ente la Conseyería d’Educación y los sindicatos  que formen parte de la Mesa Sectorial d’Enseñanza non universitaria. Nel orde del día taba l’entamu del procesu de negociación de la plantiya docente de cara al próximu cursu.

Tres un primer analís vese que nesta propuesta de plantiyes hai una llixera medría nel númberu total de puestos en comparanza col cursu pasáu, pasando de los 9.378 puestos del presente cursu, a los 9.441  propuestos pal próximu, lo cual dexa un saldu positivu de 63.

Sicasí, consideramos escasa la propuesta de places  actual, pues d’ella non solo se deduz la intención de nun amenorgar la hores llectives del Cuerpu de Maestros a ventitrés o de nun menguar hores llectives  al profesoráu mayor de 55 años, sinón que queda nidia la maniobra –ésta sí, bien consolidada-  de siguir arreglando les necesidaes reales de profesoráu por aciu la contratación de personal interino pa cubrir necesidaes estructurales del sistema, magar la reconocencia gubernamental de la contratación temporal abusiva.

Dende 2012 a 2016, la tasa de reposición (ocupación de les places dexaes llibres por xubilación) tuvo llindada al 10%, de manera que namá s’ufiertaron en concursu oposición 1 de cada 10 vacantes esistentes; depués llegó l’Alcuerdu de 29 de marzu de 2017 por aciu el cual recuperóse’l 100% de la tasa de reposición y dexó convocar les places que, dende faía siquier trés años, tuvieren ocupaes por personal con una vinculación temporal cola Alministración, col enfotu d’ amenorgar, a lo llargo de los siguientes trés años (2018, 2019 y 2020), y nun máximu d’un 90 %, les places ocupaes de forma temporal y la cifra de personal con una vinculación temporal esistente a la fecha de firma d’esti alcuerdu. A estes altures, dicir qu’esi oxetivu nunca s’algamó resulta tan obvio como repitío. ¿Qué foi lo que falló?

Magar la obligada tresparencia de l’Alministración, hai cifres que desconocemos y, coles que conocemos, nun nos cuadren les cuentes. A saber:

¿Cuántos puestos de la plantiya orgánica tán ocupaos por personal funcionario de carrera de los cuerpos docentes non universitarios?

¿Cuántos puestos de la plantiya orgánica fueron y tán siendo ocupaos por personal temporal interino?

¿Cuántos puestos procedentes de xubilaciones y otres causes de cese definitivu fueron amortizados nos postreros 10 años? Siendo la media de 500 xubilaciones per cursu, namá en cuatro cursos, ente 2012 y 2016, produciríense 2000  xubilaciones que cubrir, de les que solo se repunxeron 200 places(10% de 2000) dexándonos un saldu de 1.800 puestos ensin cubrir.

Cada entamu de cursu, siquier mientres los últimos seis, son necesarios más de 1.000 docentes interinos/es pa cubrir places vacantes a xornada completa (1.911 en 2.021). Y esta cifra cuasi nin camuda tres la execución de los procedimientos selectivos ¿cómo pue ser  posible? y ¿cómo pue ser que la plantiya orgánica apenes cambie d’un añu a otru?

La Llei Xeneral de Presupuestos del Principáu d’Asturies aprobaos pa 2022 contempla un total de 10.853 puestos pa personal docente non universitario. Si a esos 10.853 puestos presupuestaos, restamos los 9.441 contemplaos nes plantiyes –que tán supuestamente ocupaos por funcionariáu de carrera- pal cursu 2022-23, el resultáu ye de 1.412 puestos docentes a xornada completa que van poder ser cubiertos por personal temporal pa desempeñar funciones propies de profesoráu de carrera por razones espresamente xustificaes de necesidá y urxencia. Entós ¿cómo ye posible que con un presupuestu pa contratar a 1.412 docentes en réxime d’interinidá puedan contratase cuasi  2.000 a xornada completa mientres tol cursu y otros tantos a media xornada, amás de les sustituciones del personal titular? Convién recordar equí que les medies xornaes suponen más del 40% de les contrataciones temporales. La única esplicación posible:¿ye que parte del dineru presupuestáu pa plantiya orgánica destinar a contratar personal interino? Si ello fuera asina, 2000 a tiempu completu + 2000 a media xornada equivalen a 3000 a tiempu completu. 3000-1412= 1588 puestos de plantiya orgánica ocupaos por personal interino.

Y, per otru llau:

¿Cómo tienen pensao cumplir l’oxetivu d’amenorgamientu de la temporalidá nel sector públicu docente si cada añu contraten a más de 3000 persones, cuasi la metá en puestos de media xornada?

¿Cómo piensen camuflar la temporalidá del personal qu’imparte la materia de Llingua  Asturiana y Gallego-Asturianu? La especialidá nun ta reconocida pero la materia esiste, y poro, los socesivos nomamientos de les persones que les imparten.

¿Por qué sí se contabilicen nel total de puestos les places (categoría) de Cultura Clásica” que tampoco gocia de la reconocencia como especialidá? Nun consta nel Real Decreto 665/2015, de 17 de xunetu.

La respuesta a estes y otres cuestiones plantegaes van tratase n’otra mesa técnica que va tener llugar con calter inmediatu.

Cola actual propuesta de 9.441 puestos en plantiya orgánica siguimos ensin recuperar los puestos perdíos mientres los años de los retayos nel sector públicu, lo que se traduz nuna medría de la carga de trabayu del personal pa encarar la necesidaes xeneraes; y tampoco paez qu’esista la intención de consolidar una plantiya amplio y estable que dexe al nuesu sistema educativu públicu tar preparáu pa remanar con solvencia situaciones crítiques vinientes, amás d’ufiertar una enseñanza al altor de les esixencies llegales.

Ye necesario resaltar la sobrecarga llaboral y burocrático de tol personal docente, con mención especial pa quien ocupen cargos directivos, entá ye más nos centros de Primaria, dalgunos con equipu unipersonal ensin sofitos de personal d’alministración y servicios, nin de conserxería. Poro, a la discriminación estructural presistente nel Cuerpu de Maestros, esta situación de sobrecarga da-y mayor pesu, si se quier, a los argumentos que señalen la necesidá amenorgamientu del númberu d’hores llectives d’esti cuerpu y, entá más, de quien conformen equipos directivos, de manera que puedan llevar a cabu les sos funciones en condiciones dignes, lo que lleva nuevamente a la mesma conclusión: la necesidá d’ampliar les plantiyes. Esixencia recurrente que defendemos dafechu añu tres d’añu nesta Mesa Sectorial porque tamos convencíos de que ye condición sine qua non pa dar respuesta a les, cada vez más amplies y esixentes, responsabilidaes del sistema educativu llegalmente establecíes: coeducación, mayor personalización del aprendizaxe, educación pal desenvolvimientu sostenible y la ciudadanía mundial, y l’oxetivu d’algamar la plena inclusión educativa nun plazu inferior a 10 años. Con toos estos retos, la plantiya pal cursu 2022-23 llama, otra vegada, a la “mística de la vocación docente”, lo qu’en términos llaborales considérense hores estra non remuneraes, esto ye, esplotación.

A última hora, dende SUATEA consideramos l’actual propuesta de plantiyes claramente insuficiente pa dotar al sistema d’educación públicu de la cantidá de docentes necesaria si se pretende qu’estos lleven a cabu, verdaderamente, toles funciones que-yos son atribuyíes col rigor y la calidá que rique una sociedá avanzada, y con unes condiciones llaborales dignes.

Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757