SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
El porcentaxe del PIB destináu a Educación baxa hasta’l mínimu históricu del 3,8 % y caltiénense los retayos educativos
El ministru Montoro presentó nel Congresu los Presupuestos Xenerales del Estáu presumiendo de que contemplen el mayor gastu social dende la crisis. Como l’añu pasáu, el Gobiernu central preve una medría significativa de recaldación d’impuestos, pero les llínees presupuestaries vienen determinaes pol amenorgamientu del déficit públicu y el cumplimientu de los oxetivos económicos para 2020 impuestos pola UE.
El ministeriu de Facienda amazcara col anunciu d’aumentu de 50 millones para beques, de un 3 % para Educación y una medría del 1,75 % pal sueldu del personal funcionario, el caltenimientu de los retayos educativos y el descensu del porcentaxe del PIB destináu a Educación que baxa hasta’l mínimu históricu del 3,8 %. Foi precisamente esta falta de compromisu económicu lo que fixo saltar pel aire la subcomisión del Congresu pal Pactu Educativu, col abandonu de la mesma del grupu socialista, Xuníos-Podemos, PdCAT y PNV.
Coles mesmes, el maquilláu aumentu del 3 % nel gastu educativu que va destináu a personal (frutu del II Alcuerdu para la Meyora del Empléu Públicu suscritu apocayá ente Facienda y los sindicatos CSI-F, CCOO y FeSP-UXT), ta suxetu a que les Alministraciones Autonómiques cumplan coles mires de déficit, colo que la recuperación adquisitiva del profesoráu queda llueñe del más del 12 % perdíu nos últimos años. Nun hai qu’escaecer, amás, que la necesaria medría de les plantiyes docentes tamién queda al marxe, lo que sigue gravando la calidá de la escuela pública.
STEs-intersindical y SUATEA denuncien, con estos PGE, el caltenimientu de los retayos educativos y el castigu que’l Gobiernu del PP sigue infligiendo a la educación pública. El sindicatu ta estudiando la convocatoria unitaria de movilizaciones pa faer frente a los siguíos despropósitos del executivu de Mariano Rajoy.
Secretariáu de STEs-intersindical
Secretariáu de SUATEA
4 d’abril de 2018
Esta entrada está disponible en: Castellano (Castellanu)
