Home > Comunicaos > Presentada la Querella de SUATEA contra’l franquismu nos tribunales arxentinos

Presentada la Querella de SUATEA contra’l franquismu nos tribunales arxentinos

querella_argentinaPresentada la Querella de SUATEA contra’l franquismu nos tribunales arxentinos

Como yá se sabe, el 14 d’abril de 2010 interpúnxose una querella énte los tribunales de xusticia de la República Arxentina coles mires de que s’investiguen los crímenes cometíos polos integrantes de la dictadura franquista, identificar a los sos responsables y sancionalos penalmente.

Amparaos na llexislación internacional de la ONU sobro Xusticia Universal, víctimes del franquismu presentaron nel Xulgáu Nacional no Criminal y Correccional Federal Nº 1, de Bonos Aires, República Arxentina, al cargu de la Jueza María Servini de Cubría, la Querella 4591/2010, nomada “N.N. por xenocidiu y/o crímenes de lesa humanidá cometíos n’España pola dictadura franquista ente’l 17 de xunetu de 1936, empiezu del golpe cívicu militar, y el 15 de xunu de 1977, fecha de celebración de les primeres elecciones democrátiques”.

De mano presentóse por familiares d’asesinaos y esapaecíos na dictadura y tamién por asociaciones españoles y arxentines, pero los querellantes pueden ser tanto particulares como colectivos que guarden dalgún tipu de relación coles víctimes de la represión. D’esta miente, participen tanto persones descendientes de persones afectaes (asesinaos, encarcelaos, exiliaos, inhabilitaos, etc.) como organizaciones polítiques y sindicales en nome de los sos afiliaos que sufrieron la represión nel so momentu. Inclusive organizaciones que nun esistíen nesos años tamién se tán personando  como representantes o herederos de colectivos que fueron reprimíos, como ye’l casu de SUATEA.

Sábese que la represión franquista cebóse especialmente en dellos colectivos por ser consideraos especialmente allegaos al réxime republicanu. Unu d’esos grupos que sufrió la represión foi’l colectivu docente. La resultancia foi un descensu notable nel númberu de maestros y maestres: por casu, n’Asturies, ente asesinaos, presos, exiliados ya inhabilitaos pa volver exercer el maxisteriu más d’un 33% de los docentes dexaron de selo.

El nuesu sindicatu, SUATEA, creóse en 1978 dempués de dellos años de trabayar na clandestinidá impuesta pola dictadura franquista. Naquella dómina supimos de la esistencia, en décades anteriores, d’una Asociación de Trabayadores d’Enseñanza n’Asturies (ATEA) formada por docentes comprometíos con una educación nos valores republicanos, polo qu’acabaron siendo afectaos pola represión franquista namás rematar la guerra civil.

SUATEA presentóse na Querella a partir del trabayu y collaboración con grupos como La Comuña d’Asturies que foi quien nos punxo en contactu cola rede de sofitu a la querella a nivel estatal (CEAQUA). Cola so mediación presentamos énte’l Xulgáu de Bonos Aires un llistáu compuestu polos nomes y apellíos de 101 persones, maestros na so inmensa mayoría. Tratar de distintos casos ente los que s’atopen execuciones estraxudiciales y paseos o personal que sufrió les consecuencies de Conseyos de Guerra. Esti grupu representa una amuesa de los carecimientos que sufrió’l personal docente n’Asturies tres la entrada de les tropes franquistes.

Esta selmana, los nuesos abogaos informáronnos de la entrega de la documentación oficial apurrida por SUATEA pa faenos  presentes na Querella que tien como oxetivu acabar cola impunidá de la dictadura y llimpiar los llibros d’historia de la que dignificar l’exemplu que supón la trayectoria d’aquellos profesionales de la enseñanza qu’acabaron sufriendo diverses formes de opresión, inclusive apurriendo les sos vides.

Asturies, 3 de xunetu 2018

 

Esta entrada tamién se puede consultar en: Castellanu