Presentación guía “41 midíes pa enfrentase a la LOMCE”

Esta entrada está disponible en: Castellano (Castellanu)

foto-rueda-prensa-41-medidas-lomce

Ayer SUATEA presentó en rueda de prensa una guía con  “41 midíes pa enfrentase a la LOMCE”.
SUATEA presentó en rueda de prensa la Guía “41 Midíes pa enfrentase a la LOMCE” que pretende ser una propuesta empobinada a la comunidá educativa asturiana con una riestra d’esixencies a la Conseyería d’Educación que va ser quien n’Asturies tenga la responsabilidá
d’afitar los desarrollos lexislativos de la nueva Llei d’Educación.
Nesti documentu faese una introducción na que se plantega que la llucha contra la implantación
de la LOMCE ta enserta dientro d’una respuesta xeneral contra les polítiques d’esmantelamientu de los sectores públicos que se tán faciendo pol gobiernu del PP (y que
n’Asturies tán siendo aplicaes pola Conseyería d’educación). Tres esta introducción,
plantegamos la Llei que creemos necesaria pa defender la enseñanza pública y de calidá. Nesti
sen, pa entamar la insumisión a la LOMCE, esbillamos una serie de midíes que van destinaes a
distintos sectores de la comunidá educativa: a la Conseyería d’Educación (a quien se-y
plantega por exemplu desaniciar evaluaciones, torgar la publicación de rankings, evitar la
especialización curricular…); a les families (a les que s’encamienta nun escoyer relixón o nun
llevar a clase a los sos fíos y fíes el día de la reválida…); a los claustros de profesoráu (a quien
se-yos plantega que nun segreguen al alumnáu tempranamente); a les direcciones de los
centros (a quien s’encamienta nun utilizar les prerrogatives que-yos apurre la LOMCE …); y a
los conceyos pa que nun cedan suelu públicu en favor de los centros privaos.
Trátase, entós, d’una iniciativa pa ser presentada a los distintos sectores, pa ser debatida nos
centros y coles families, una iniciativa que pue y tien de ser arriquecida coles propuestes que
salgan del debate ente quien defendemos la escuela pública.
D’otra parte, SUATEA insistió na rueda de prensa – na que participaron Yolanda Iglesias,
Emma Rodríguez y Beatriz Quirós- nel so total refugu a la convocatoria d’oposiciones
anunciada pola Conseyera d’Educación.
Amás d’insistir nos argumentos de qu’esta OEP nun va iguar el grave problema de precariedá y
de falta d’estabilidá del profesoráu interín, plantegóse que miles de persones de tol Estáu van
presentase a les oposiciones de les especialidaes venceyaes a la FP, yá qu’esta ufierta namás
va facese n’ Asturies. Ensin dulda nenguna, l’efectu llamada ta garantizáu.
Esta situación va suponer que cientos d’interinos y interines que trabayen anguaño n’Asturies
van poder perder el so puestu de trabayu, aumentando asina les tases de paru na nuesa
Comunidá.
N’Asturies nun hai nengún mecanismu que garantice la estabilidá del profesoráu interín, cosa
que sí asocede en bona parte de les demás Comunidaes Autónomes. Por ello, SUATEA esixe
la garantía d’estabilidá pal profesoráu interín y refuga dafechu les declaraciones de la
Conseyera d’Educación realizaes na Xunta Xeneral la selmana pasada nes qu’amosaba’l so
despreciu pol profesoráu interín, al que pretende utilizar como un kleenex.
La Conseyera esclaria asina cuáles son les sos intenciones: convocar un garapiellu de places
p’asina poder cambiar les llistes, cambiando’l baremu pa quitar pesu a l’antigüedá y despidir al
profesoráu interín que-y cuesta “más caru”, yá que, por sentencia, la conseyería tien que pagar
l’antigüedá a esti colectivu. Asina, lo que pretende nun ye estabilizar nel emplegu al profesoráu
interín (reivindicación que n’otres CCAA defende’l PSOE con tanta brenga), sinón llibrase d’esti
colectivu p’aforrar unos miles d’euros.
SUATEA va convocar nel mes de febreru asamblees d’interinos pa desarrollar les
movilizaciones pertinentes nel casu de que la Conseyera nun arrenuncie a una propuesta
incoherente y con efectos que puen ser demoledores pal yá precarizáu emplegu interín
asturianu.

 

Print Friendly, PDF & Email

Esta entrada está disponible en: Castellano (Castellanu)