Precariedá y vulneración de derechos

Precariedá y vulneración de derechos

Entama un nuevu cursu escolar y el profesoráu de Llingua Asturiana y Gallego-Asturianu sigue sufriendo otru añu más la precarización nel so puestu de trabayu. Cuasi la totalidá  ye profesoráu interino y na primera axudicación asígnáronse-y puestos a media xornada (85% de los totales) en munchos casos itinerantes. Esta tendencia a la precarización llaboral con contrataciones a media xornada ye constante nos caberos años:  69% en  2015 y 2016, 72% en 2017 y 82% en 2018.  Y nun respuende a una merma na demanda  d’esta materia voluntaria per parte del alumnáu y los padres, sinón a criterios economicistes que primen l’aforru percima la calidá educativa y los derechos del alumnáu a escoyer y recibir llibremente estes enseñances. 

Consecuencia de la esistencia de places a media xornada de Secundaria, sobre too aquelles más alloñaes del centru, ye que’l profesoráu nun les escueye y l’alumnáu queda ensin recibir clase meses (8 institutos el cursu pasáu) o incluso’l cursu completu (Zarréu -Degaña- onde l’alumnáu tuvo tol cursu pasáu ensin proferoráu. Esti cursu detectamos tamién resistencia a ampliar a xornada completa delles places que s’axudicaron como medies magar que les sos necesidaes horaries son superiores. Irregularidaes y falta d’atención vienen cronificándose dende va unos cursos y van tener efectos esti: influir negativamente na escoyeta de l’asignatura. 

Al alumnáu d’Educación Infantil (E.I.) nun se-y ufierta estes enseñances debío a la irregular forma d’actuar de la nuestra Conseyería Educación: solo nel casu qu’al profesoráu de Primaria contratao-y sobre hores llectives nel horariu s’ufierta la posibilidá de que l’alumnáu d’E.I. les reciba. Esta forma d’actuar ye dafechu contraria a la Llei d’Usu y dada la masiva contratación de profesoráu de Primaria a media xornada ta nidio que nun hai nengún interés por atender a esta etapa educativa básica nel deprendimientu y sobrevivencia d’una llingua. D’ehí que’l númberu d’ecueles con Asturianu o Gallego-Asturinianu na Educación Infantil seya ínfimu y qu’haya padres y madres a los que nun s’atiendan les sos demandes d’escolarización nes nuetres llingües.

En viendo esta situación, el camín a la oficialidá qu’hai que dir andando preséntase enllenu bardos, les nueves conseyeres d’Educación y Planificación Llingüística puen cuntar con nosotros na sestaferia. Nós yá tenemos preparada la ferramienta: acabar coles medies xornaes y la precariedá; discriminación positiva na elección voluntaria de l’asignatura, reconocimientu de la especialidá docente y concursu de tresllaos; formación del profesoráu; xeneralización de la ufierta en toles etapes educatives; y dotación presupuestaria. 

El Secretariáu de SUATEA

N’Uviéu a 10 de setiembre de 2019