Precariedá y falta de compromisu coles nuestres llingües

Nes escueles y los institutos asturianos el profesoráu encargáu del enseñu de les nuestres llingües ye cuasi dafechu interino. Pal entamu d’esti cursu, como vien siendo norma nos caberos años, los contratos son mayoritariamente a media xornada: en Primaria el 80% d’un total de 188 contratos d’Asturianu. Sicasí, na Educación Secundaria los contratos a media xornada mermaron en comparanza con otros cursos y esti pasen a ser el 43% d’un total de 76 d’Asturianu. Teniendo en cuenta toles places axudicaes nos dos cuerpos y les nuestres dos llingües, les cifres amuesen nidiamente la precariedá del profesoráu interino d’Asturianu y Gallego-Asturianu: places a tiempu completu, 29% de 278; places a media xornada: 71% de 278. 

La situación de precariedá cronifícase y agrávase col tiempu al nun tener esti profesoráu nenguna oportunidá d’acceder a la fixeza de los puestos nin por concursu-oposición, como forma ordinaria d’accesu, nin por estabilización por aciu d’otros procedimientos, como venimos demandando dende SUATEA pal profesoráu interino que vien enriestrando contratos añu tres añu. La falta de fixeza del personal inflúi na falta de calidá de la enseñanza al nun dotar d’estabilidá y continuidá a los programes aplicaos nos centros que se compensa, na midida de lo posible, col compromisu y l’esfuerzu del profesoráu. 

Esti profesoráu ye discriminao al nun tar contemplaes les especialidaes de Llingua Asturiana y Gallego-Asturianu al mesmu nivel que les otres y colos mesmos efectos alministrativos, lo que fai urxente’l so reconocimientu. 

L’estancamientu nes cifres de contratación y la precarización del emplegu son dos indicadores qu’amuesen la falta de compromisu real de la Conseyería d’Educación y el Gobiernu asturianu coles nuestres llingües, pero nun son los únicos: 

• La falta d’atención llingüística ye sangrante  na Educación Infantil vulnerando la Llei d’Usu y el derechu del alumnáu a recibir voluntariamente estes enseñances, más entá cuando ta psicolóxicamente demostrao qu’esta etapa ye fundamental pal correctu aprendizaxe de les llingües. 
• La perda d’alumnáu que  sufre la Educación Secundaria y Bachilleratu  como consecuencia de convertir la voluntariedá na elección de l’asignatura (recoyida na llei) n’optatividá (nun recoyida na llei) frente a otres atractives materies, tamién ye significativo.  
• La ruindá de places ufiertaes na formación anicial del profesoráu na Mención del profesoráu de Primaria y Máster de Secundaria, sumen dellos más. 

Comprometese coles nuestres llingües y actuar ye urxente: 

• Reconociendo les especialidaes d’Asturianu y Gallego-Asturianu 
• Fixando les pantiyes al traviés de concursu-oposición y otros procedimientos. 
• Camudando los currículos p’aumentar el tiempu de l’asignatura y la so presencia en toles etapes educatives. 
• Esaniciando los contratos a media xornada del personal interino. 
• Meyorando la formación del Profesoráu. 
• Declarando la OFICIALIDÁ.

El Secretariáu de SUATEA

Uviéu a 21 de setiembre de 2020