Posición del SUATEA sobre la integración del PTFP nel A1.

A cuenta de la esperada Resolución pa la integración del profesoráu del cuerpu, a desaniciar, de Profesores Técnicos de Formación Profesional del Cuerpu de Profesoráu d’Enseñanza Secundaria recoyida na LOMLOE y regulada pol RD 800/2022 establezse esti procedimientu que dexa ensin respuesta polo menos a los siguientes colectivos:

• Profesoráu pendiente d’integración en cuerpu de Secundaria con xubilaciones después del 19 de xineru del 2021 y qu’agora nun pueden solicitar incorporase al nun ser personal de carrera n’activu nesti momentu.
• Profesoráu que teniendo superáu l’últimu procesu selectivu tuvo de practiques el cursu 20-21 y que nun se-y va reconocer esta integración hasta la fecha onde se fae efectivu’l so nomamientu como funcionarios y funcionaries de carrera, y a lo cabero.
• El profesoráu interín.

El SUATEA denunciamos que nun s’incluya a estos colectivos qu’algamen les condiciones de titulación pal acceso al Cuerpu de Profesoráu de Secundaria y que desenvuelven el so trabayu en condiciones idéntiques que los funcionarios de carrera n’activu de magar entró la normativa en vigor, carecen un agraviu comparativu al tar ocupando les mesmes places y desenvolviendo idénticu llabor docente, nun permitiéndo-yos dicha inclusión con efectos dende’l 19 de xineru del 2021; poro, la percepción de los correspondientes derechos salariales y alministrativos venceyaos a dichu cuerpu dende esa fecha.

Esta diferenciación de tratu ensin xustificación obxectiva supón una vulneración de lo dispuesto na cláusula 4 de la DIRECTIVA 1999/70/CE del Conseyu del 28 de xunu de 1999 relativa al Alcuerdu marcu de la CES, la UNICE y el CEEP respecto al trabayu de duración determinada; y la xurisprudencia lo mesmo española como europea que lo interpreta.

Poro, el SUATEA ponemos al serviciu de la nuestra afiliación y de los colectivos afectaos el procedimientu pa reclamar estos derechos.

Queremos denunciar tamién que les consecuencies de la entrada en vigor d’esta normativa dexa a un colectivu afectáu gravemente, el profesoráu de FP ensin la titulación universitaria. Pa esti colectivu l’Alministración ha buscar soluciones inmediates viendo la posibilidá de que queden ensin trabayu depués d’años d’experiencia y ensin, na mayoría los casos, posibilidaes de poder estabilizar la so situación pola escasa o nula ufierta d’oposiciones de munches de les especialidaes del desaniciáu cuerpu de Profesoráu Técnicu de Formación Profesional.

N’Uviéu a 24 febreru de 2023