Posición de SUATEA énte la modificación del calendariu

El 9 de setiembre celebróse tuvo llugar una “xunta” ente la Conseyería d’Educación y los sindicatos de la xunta de personal docente non universitariu, p’axustar un cambéu del calendariu escolar que lleva yá publicada dende’l día 4, esto ye, 5 díes antes.
El nuevu calendariu supón acabar les clases a 30 de xunu pa gran númberu d’enseñances, polo que tol trabayu final del profesoráu (evaluaciones, memories, procesos de reclamaciones, trabayos de recuperación, etc.) muévese a los 10 o 15 primeros díes de xunetu, y más allá entá pa los equipos directivos de los centros que tien de realizar los llabores de zarru del cursu y organización del siguiente.
A esto súmase la desapaición de 5 díes non llectivos:
✎ El 30 d’ochobre.
✎ El 23 d’avientu.
✎ El 8 de xineru.
✎ El 15 de febreru.
✎ El 5 d’abril.
Ye nidio que tamos énte una alteración de condiciones llaborales que nun tendríen de ser publicaes ensin el previu alderique colos representantes del profesoráu y ensin escuchar tan siquier les sos propuestes.
Como se sabe, l’últimu procesu d’oposiciones viose atayáu y quedó movíu pa ser completáu al rematar les clases lectives del 2020-2021, ¿de cuándo taríemos falando a la vista d’esti nuevu calendariu?
El profesoráu lleva nos sos puestos dende’l día 1 de setiembre, trabayando sobre les improvisaciones de la Conseyería d’Educación pa llograr echar a andar el cursu. La concentración de clases esaniciando periodos non llectivos y el retrasu del so final escarez de criterios pedagóxicos.
L’esfuerzu d’adaptación realizáu pol profesoráu nel presente cursu y el tiempu invertíu polos equipos directivos en poner en marcha midíes organizativas de prevención sanitaria nun merecen esta rempuesta.

Esti va ser un añu bien difícil nel que’l profesoráu va volver facer un sobreesfuerzu, y esti, como ye de lóxica, nun pide nengún tipu de pagu nun momentu nel que tola sociedá tien d’arimar el costazu. Lo que’l profesoráu pide ye que nun se-y enzanque más, de forma gratuita y ensin criterios pedagóxicos, l’enorme llabor que se-y avera

Caltener l’anterior calendariu, añadiéndo-y namás la modificación debida al retrasu nel entamu les clases, pue suponer nel peor de los casos una pérda de 10 díes llectivos, pero una meyo organización, atención y racionalidá nel trescursu d’estos.

Uviéu, 10 de septiembre de 2020