Por una xubilación igual ente docentes

Esta entrada está disponible en: Castellano (Castellanu)

LOS STES-I ESIXEN A LA SEGURIDÁ SOCIAL LA EQUIPARACIÓN NEL ACCESU A LA XUBILACIÓN DE TOLOS COLECTIVOS DOCENTES DE LA ENSEÑANZA PÚBLICA

El 4 d’abril, a instancies de los STEs-i, tuvo llugar una xunta billateral cola Directora Xeneral de la Seguridá Social, Mª Gloria Redondo Rincón, pa espone-y les diferencies nel accesu a la xubilación del personal funcionario de carrera y del personal interino y tratar de buscar soluciones que corrixan les desigualdaes.

Nel Estáu español hai dos modalidaes de xubilación del personal funcionario: per una parte, el personal incluyío nel Réxime de Clases Pasives del Estáu, nel que tán integraos los funcionarios de carrera ingresaos na función pública en fecha anterior al 1 de xineru de 2011;  per otra, el personal integrao nel Réxime Xeneral de la Seguridá Social, esto ye, el personal interino y el personal funcionario ingresáo dempués de 2011.

La xubilación del personal funcionario del Réxime de Clases Pasives, en relación a la xubilación voluntaria, esixe tener cumplíos sesenta años d’edá y reconocíos trenta años de servicios efectivos y, amás, nun se-yos aplica coeficiente reductor. Sicasí, nel Réxime Xeneral de la Seguridá Social, les condiciones p’aportar a la xubilación son muncho más estrictes, pues de forma graduada va llegar a la xubilación a los 67 años en 2027 y , en casu de xubilación anticipada, ríquese tener cumplida una edá que nun sía inferior en dos años, a lo más, a la edá esixida en cada casu y acreditar un periodu mínimu de cotización efectiva de trenta y cinco años, aplicando un coeficiente reductor ente’l 1,625% y el 2% por trimestre en función de los años cotizaos.

Precisamente estes importantes diferencies na xubilación anticipada ente dambos réximes llevaron a incluyir la Disposición adicional quinta nel Real decretu lexislativu 5/2015, de 30 d’ochobre, pol que s’aprueba’l Testu refundíu de la Llei del Estatutu Básicu del Emplegáu Públicu (nos mesmos términos de la disposición adicional sesta de la redacción inicial del EBEP -Llei 7/2007) na que s’indicaba: El gobiernu va presentar nel Congresu de los Diputaos un estudiu sobro los distintos réximes d’accesu a la xubilación de los funcionarios que contenga, ente otros aspeutos, encamientos p’asegurar la non discriminación ente colectivos con característiques similares y la conveniencia d’ampliar la posibilidá d’aportar a la xubilación anticipada de determinaos colectivos”.

Trescurrieron doce años d’esta Disposición y los distintos gobiernos nun encetaron  los términos incluyíos nella. Ye más, nel añu 2017, el Defensor del Pueblu emitió un Encamientu al Ministeriu de Facienda y Función Pública pa que se dea cumplimientu a la Disposición incluyida nel EBEP.

Poro, dende los STEs-i solicitóse esta xunta cola Directora Xeneral de la Seguridá Social pa espone-y la situación y la especificidá del sector docente, amás d’esixir que, no rellacionao con xubilación, se corrixa la discriminación  esistente ente colectivos con característiques asemeyaes, ampliando la posibilidá de que’l personal perteneciente al Réxime Xeneral de la Seguridá Social apuerte a la xubilación voluntaria n’asemeyaes condiciones al personal perteneciente al Réxime de Clases Pasives, adelantrando la edá, los años cotizaos y ensin aplicar coeficientes reductores.

Dende STES-i, comprometímosmos a unviar un Informe de salú llaboral, detallando la incidencia que’l retrasu de la xubilación supón pal profesoráu y evidenciando la relación ente’l trabayu docente y dellos trestornos de salú a nivel físicu y psicolóxicu. La Directora Xeneral comprometióse a analizar y valorar tolos datos y documentación apurrida polos STEs-i y treslladalo al Secretariu d’Estáu de Seguridá Social pa buscar posibles soluciones. Dende los STEs-i, vamos siguir trabayando y batallando pa que se corrixan les desigualdaes nel accesu a la xubilación de tol profesoráu de la enseñanza pública, equiparando les condiciones del profesoráu perteneciente al Réxime de la Seguridá Social a les del profesoráu perteneciente al Réxime de Clases Pasives.

Uviéu , 5 d’abril de 2019

Print Friendly, PDF & Email

Esta entrada está disponible en: Castellano (Castellanu)