SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
La llegada de la pandemia del COVID-19 punxo de manifiestu la vulnerabilidá de la sociedá énte la presencia de nuevos virus infeiciosos desconocíos hasta agora. Son numberosos los estudios de calter científicu que se vienen realizando dende l’entamu de la mesma, a la busca de respuestes que dexen apangar los efectos del mesmu hasta’l momentu en que s’atope bien una vacuna o bien una solución terapéutica. Nestos momentos, esiste consensu ente la comunidá científica qu’afirma qu’”hai una evidencia apolmonante” a favor de que la inhalación del SARS-Cov-2 “representa una vía principal” de tresmisión de la enfermedá, sía ésta a partir de gotes pequeñes de cuspia o de la suspensión del virus nel aire en forma d’aerosol.
La so pervivencia n’espacios zarraos, mal ventilaos, fai qu’aumente’l riesgu d’andanciu. Esti fechu fai que les aules presenten un riesgu especial polo que l’usu del mázcaru ye la principal barrera cola que cuntamos pa evitar la so penetración peles víes respiratories. Ye por ello que La Conseyería d’Educación repartió nos centros educativos unos pocos mázcaros de duldosa homologación y delegó nellos la compra posterior de les necesaries.
Nel Protocolu de Salú Llaboral pa la Prevención d’andada por COVID-19 nel ámbitu llaboral del Personal Docente de 11 de mayu, 2020 prescríbese al profesoráu l’usu de mázcaros con unes determinaes característiques (hixéniques o sanitaries, si l’alumnáu tamién lu utiliza, o FFP2 si l’alumnáu nun lu emplega). Dende SUATEA queremos recordar que la correcta aplicación d’esti Protocolu, tendría de conducir a xeneralizar l’empléu de mázcaros FFP2 nestes últimes circunstancies. Sicasí lo que ta asocediendo ye que s’utilicen de forma mayoritaria los mázcaros hixénicos, non sanitaries o los quirúrxicos, inclusive nos casos de tener qu’atender a alumnáu que, pola so edá, nun ta obligáu a usales como n’Educación Infantil o con parte del alumnáu de necesidaes educatives especiales.
La falta d’empléu de mázcaros FFP2 nestes circunstancies, bien por desconocimientu de la norma de prevención o pola falta de suministru de les mesmes dende l’alministración, supón un riesgu pa la salú del profesoráu. Nada se tien previsto sobro la durabilidá de cada mázcaru nin la cantidá d’elles que se va a suministrar pa dir reponiéndoles a lo llargo del cursu. La mayor parte del profesoráu ta mercándoles col so propiu dineru por cuenta de que nun se tien planiada la so reposición por gastadura y perda d’eficacia col usu. Por ello, dende SUATEA esiximos a la Conseyería d’Educación:
- Dotación y compra centralizada de mázcaros sanitarios que cumplan la normativa de tou productu sanitariu (Directiva 93/42/CE, el Reglamentu 2017/745, y los requisitos técnicos descritos na norma UNE-EN 14683:2019 AC)
- Reposición periódica a lo llargo del cursu de mázcaros y otru material de protección siguiendo los criterios sanitarios.
- Dotación de bates, vestuariu y otros materiales de protección, amás de los mázcaros FFP2, pal profesoráu qu’atiende alumnáu que nun ta obligáu a usales (EI y NEE).
El Secretariáu de SUATEA
N’Uviéu a 9 d’ochobre de 2020.
Esta entrada está disponible en: Castellano (Castellanu)
