Poles 23 hores llectives n’Infantil y Primaria.

SUATEA reclama l’amenorgamientu de les hores llectives n’infantil y primaria de 25 a 23 para ameyorar les condiciones llaborales y la calidá educativa.

La xornada llaboral d’un docente ye muncho más que’l tiempu presencial colos alumnos. Ríquese tiempu p’axuntase colos padres, pa coordinase colos demás profesores, pa preparar les clases, pa correxir les xeres, pa formase y actualizase, p’analizar les estratexes d’atención a la diversidá, o pa realizar la cada vez más aplastante burocracia. Too ello, nel so conxuntu, suma les 37,5 h de xornada llaboral (presencial y non presencial) d’un docente. O, al menos, debería, pos la realidá ta llevando a munchos docentes a superar en demasía les 40 hores de xornada selmanal. Y ye que, con 25 hores selmanales llectives, la totalidá del trabayu non llectivu tien que s’acumular nes 12,5 hores selmanales restantes. Dos hores y media de llunes a vienres pa toles xeres enantes indicaes ye una cantidá de tiempu francamente pequeña, lo que lleva a bona parte del profesoráu a faer una bona dosis d’hores estra non remuneraes pa poder dar al so alumnáu l’atención que merez.

Sicasí, esti usu d’hores estra non remuneraes, amás de ser una violación directa de los derechos llaborales del profesoráu d’infantil y primaria, supón una amenorga na calidá de la educación. Enseñar a grupos de 25 neños y neñes de 3 a 12 años ye una xera agotadora, y supón un esgaste importante. L’escesu d’hores presenciales, nun solo amenorga’l tiempu posterior para preparar les clases y diseñar estratexes d’atención a la diversidá, y realizar el restu de xeres yá enantes comentaes, sinón que perxudica a les mesmes hores d’atención personal del alumnáu, que s’atopa con un profesoráu, cansáu, desimíu y esgastáu que nun va poder realizar el so trabayu cola mesma eficacia. L’amenorgamientu del númberu d’hores llectives ye, por tanto, nun solo un imperativu llaboral, sinón tamién una necesidá p’ameyorar la calidá educativa na etapa sobro la que, precisamente, va constituyir la base sobro la que va descasar el restu de la vida académica del alumnáu.

Por too ello, dende SUATEA llevamos casi 10 años solicitando l’amenorgamientu del númberu d’hores llectives n’infantil y primaria a 23. Entendemos qu’esti amenorgamientu de dos hores va dexar que se faiga too esi trabayu que nun ye docencia directa y qu’anguaño ta afogando al profesoráu d’estes etapes pero, amás, entendemos que, al suponer un amenorgamientu de los periodos de docencia directa col alumnáu, va amenorgase la esgastaura del profesoráu, y va ameyorase la calidá educativa. Per otru llau, el pidimientu de SUATEA ta amparáu llegalmente pola Llei 4/2019, de 7 de marzu que, nel so artículu 1.2, aconseya a les comunidaes autónomes que l’horariu docente nun supere les 23 hores llectives n’infantil y primaria, esto ye, la norma estatal aconseya lo mesmo que SUATEA demanda, pero l’alministración asturiana, pel momento, niégase a aplicar.

Sicasí, nel entamu de cursu, entrevistamonos cola actual conseyera d’educación, Lidia Espina, que nos amosó la so simpatía por esta midida, reconociendo que, como maestra de primaria, entiende les motivaciones que lleven a SUATEA a pidir que s’implante. Entendiendo, por tanto, qu’hai voluntá política de faelo, solo falta traducir esa voluntá n’aición. Por ello, dende SUATEA, pidimos a la Conseyería d’Educación que se llexisle n’esti cursu la llimitación a 23 hores llectives n’infantil y primaria, pa que seya aplicada nel cursu siguiente y al Gobiernu asturianu que lu tenga en cuenta na aprobación de los presupuestos pal añu viniente.