Pola meyora de les condiciones de trabayu

1. Derogación inmediata del Real Decretu-Llei 14/2012, de 20 d’abril, de midíes urxentes de racionalización del gastu públicu nel ámbitu educativu que supunxo l’empeoramientu de les condiciones llaborales del profesoráu asturianu. Reversión de tolos recortes impuestos.
2. Estabilidá de les plantiyes docentes. Non a la movilidá forzosa nin a la redistribución d’efectivos (contemplaos nel R. D. del concursu de tresllaos). Non a l’axudicación forzosa de destinos.
3. Negociación añal tanto de les plantiyes docentes como de les necesidaes autorizaes, lo mesmo que de toles creaciones, supresiones, amortizaciones y habilitaciones. Non a l’amortización de places y non al piesllu d’unidaes.
4. Pola meyora del serviciu educativu cola aplicación de midíes como reducción de ratios, desdobles y creación de nuevos puestos de trabayu.
5. Concursu de tresllaos: facer públiques toles places que se vayan a axudicar enantes de facer los pidimientos. Axudicación de destín definitivu a funcionariáu de carrera nel cursu siguiente a llograr la plaza nel concursu-oposición. Garantía de caltenimientu de los destinos definitivos algamaos nel concursu de tresllaos. Respetu a los derechos adquiríos pol profesoráu funcionariu. Accesu del profesoráu del Cuerpu de maestros al primer ciclu de la ESO, mientres nun se llogre la reivindicación del cuerpu únicu. Por un concursu de tresllaos cola antigüedá como criteriu preferente.
6. Xornada llaboral de 35 hores selmanales frente a les 37,5 actuales. Reducción de la xornada llectiva en tolos niveles educativos. Establecimientu con calter inmediatu de la reducción a 18 hores en Secundaria y 23 hores en Primaria p’avanzar hasta un amenorgamientu de 3 hores llectives pa tol profesoráu. Regulación específica del horariu y xornada llaboral del profesoráu que trabaya en distintos turnos nun mesmu centru, asina como de la reducción de xornada por situaciones específiques.
7. Meyora de les condiciones del profesoráu itinerante. Aumentu de dietes por kilometraxe y pagu mensual d’elles. Parque móvil pa esti profesoráu y, mientres nun s’algame, concesión de creitos ensin intereses pa l’adquisición de vehículos. Seguru a tou riesgu a cargu l’Alministración.
8. Reducción del horariu llectivu a les persones mayores de 55 años, ensin menguade retribuciones.
9. Xubilación voluntaria anticipada a los 55 años y xubilación col 100% de les retribuciones, a los 30 años de serviciu o a los 60 d’edá, incluyíu’l profesoráu interín.
10. Garantía de xuba salarial añal, siquiera equivalente a la del IPC,pal profesoráu xubilaú.
11. Establecimientu de garantíes xurídiques plenes (responsabilidá civil) pa tol profesoráu mientres desarrolle’l so llabor docente: n’hores llectives, complementaries y estraescolares. Derechu a la defensa xurídica efectiva pal profesoráu que la necesite y pagada pola Alministración.
12. Nomamientu como funcionaries de carrera cola mesma antigüedá que la so promoción a les muyeres que, por permisu maternal o baxes rellacionaes col embaranzu, aplazaren el so períodu de práctiques.
13. Eliminación de la obligación d’itinerar pa les muyeres embarazaes desque se tenga conocencia del embaranzu.
14. Aplicación de la nueva normativa sobre protección de datos, garantizando la tresparencia y facilidá de control públicu nes rellaciones cola Alministración.
15. Sustitución inmediata del profesoráu ausente pa garantizar el derechu del alumnáu y pa nun sobrecargar de trabayu al restu del claustru.
16. Otres meyores pa tol profesoráu:

Implantación del añu sabáticu. Establecimientu d’un plan que garantice l’accesu a tol profesoráu que lo solicite.

Establecimientu d’un plan de permutes temporales n’Asturies o con otres CCAA.

Posibilidá d’escedencies de curtia duración con reserva de puestu y consideración del periodu d’escedencia como periodu de cotización efectiva pa causar derechu a prestaciones por xubilación, incapacidá permanente o muerte.

17. Reserva d’una hora complementaria (hora sindical) de la xornada llaboral pa que’l profesoráu pueda axuntase y tratar cuestiones llaborales.