Pola Escuela Pública

Esta entrada está disponible en: Castellano (Castellanu)

1. Dotación presupuestaria amañosa pal sistema educativu públicu: aumentu de la so financiación hasta un 7% del PIB. El gastu educativu actual representa el 3,8 % y la media na UE ye del 5,3 % del PIB.
2. Negociación d’una rede pública de centros pa satisfacer toles necesidades nes etapes y enseñanzas, obligatories y non obligatories.
3. Prioridá absoluta de la escolarización en centros públicos frente al pretendíu derechu de “eleición de centru”.
4. Eliminación de conciertos educativos con empreses privaes, la mayoría en manes d’ordenes relixoses y ampliación de la rede pública pa cubrir la escolarización de tol alumnáu.
5. Eliminación darréu de los conciertos a los centros que segreguen al alumnáu en función del sexo o de cualesquier otra circunstancia. Eliminación progresiva del restu de conciertos educativos.
6. Non a la cesión de suelu públicu a empreses privaes pa la construcción de centros escolares.
7. Derogación del Real Decretu-Llei 14/2012, de 20 d’abril, de medíes urxentes de racionalización del gastu públicu nel dámbitu educativu. Reversión de tolos recortes impuestos.
8. Refugu a la Llei d’Evaluación y los sos incentivos.Tresformación d’ellos nuna xuba llinial igual pa tol profesoráu que recupere y meyore’l poder alquisitivu perdìu.Homologación retributiva.
9. La evaluación ha ser una xera interna, empobinada a la detección y superación de les estorbises y problemes plantegaos, esto ye, a la meyora y perfeccionamientu del sistema educativu públicu.
10. Por una escuela democrática, crítica, que favoreza’l trabayu n’equipu. Refugamos la competitividá ente los centros, ente’l profesoráu y cualesquier tipu de desregulación llaboral o económica.
11. Ellaboración, nel marcu de la Mesa Sectorial, d’un plan de Centros y equipamientos escolares, col envís de poner una dotación digna pa tolos centros escolares no que cinca a infraestructures y dotaciones materiales.
12. Desiximos la dotación necesaria de personal docente y non docente nos Centros educativos p’afayar les plantiyes a les sos necesidaes educatives y asistenciales, garantizando l’apoyu a la integración del alumnáu con Necesidaes Específiques d’Apoyu Educativu (NEAE), la compensación educativa, asina como l’atención a la diversidá.
13. Sustitución áxil ya inmediata de les ausencies del profesoráu.
14. Establecimientu del Cuerpu Únicu d’Enseñantes.
15. Non a les reválides que desvirtúen la evaluación continua, y non a los “rankings” de centros. Equilibriu distributivu del alumnáu con Necesidaes Específiques d’Apoyu Educativu evitando que s’espardan los centros “guetu”. Non a les evaluaciones esternes del sistema educativu, subordinaes a oxetivos de mercantilización, privatización y precarización llaboral.
16. Fortalecimientu d’un enseñu públicu y de baldre, que refuercie les diferentes rames del conocimientu, l’espíritu críticu y la laicidá: la relixón fuera la escuela. Acabar cola enseñanza confesional de cualesquier doctrina relixosa nel currículu escolar. Desapaición de tolos símbolos y actos relixosos en tolos centros d’enseñanza.
17. Usu de software llibre na Alministración y en tolos centros educativos. Dotación del personal necesariu y con cualificación tanto pa la formación del profesoráu nes TICs como pa la xestión de los sistemes informáticos nos centros educativos, lliberando en consecuencia a los coordinadores TICs de funciones de calter puramente informáticu y non educativu.
18. Por una escuela coeducativa ya igualitaria, basada nel principiu d’equidá.

Esta entrada está disponible en: Castellano (Castellanu)