Pola dignidá y la estabilidá del profesoráu interín. Cientos de persones concéntrense n’Uviéu

Convocaos por SUATEA cientos d’interinos concentráronse esta tarde delantre la Xunta Xeneral para espresar el so refugu’l alcuerdu d’interinos y al intentu d’mposición d’una fecha llímite pa algamalu.

L’oxetu de la negociación que se ta faciendo nestos momentos afecta tanto al sistema d’ellaboración y funcionamientu de les llistes d’interinos como a les condiciones llaborales d’esti colectivu. Dada la trascendencia que tien, esta negociación tendría de facese col tiempu abondu pa poder abordar tolos aspectos implicaos y poder debatir y facer les correspondientes propuestes.Na práctica lo único que tien interés en resolver l’alministración ye’l cambéu de baremu pa la ellaboración de les llistes tres los procesos selectivos. El calendariu que s’aplica nesta negociación ta determináu poles prieses pa facer una convocatoria d’oposiciones a la que mos oponemos tola parte social.

El baremu que se propón pa zarrar esti alcuerdu empiora la situación de les persones que trabayen como interines anguaño:

• Vencéyase la continuidá nes llistes a la presentación a les oposiciones
• Mengua’l porcentaxe de la esperiencia docente sobre’l cómputu total
• Danse puntos adicionales por cada fase superada de la oposición
• Lléndase la posibilidá d’apurrir notes d’otros procesos selectivos anteriores
• En casu d’empate, la esperiencia docente queda en tercer llugar como criteriu a considerar detrás de los apartaos del procesu selectivu

Xustifícase la propuesta de l’alministración presentando un conflictu d’intereses ente los que yá tán trabayando y los que tán acabantes de titular que quieren acceder a la docencia. Sicasí nun s’asume nenguna responsabilidá por aplicar una política a lo llargo de los últimos años na que, de manera sistemática, decidíase nun convocar oposiciones. Dende’l cursu 2002/03 produciéronse 3.808 xubilaciones y solo s’ufiertaron nos procesos selectivos 1.296 y eso que l’alumnáu tamién aumentó. A estos datos hai qu’añedir les postreres midíes col retayu de plantiyes, amortizando les xubilaciones y llindando les unidaes en dellos centros. D’estes práctiques nun pue deducise qu’hai un interés n’integrar a los qu’acaben de terminar los sos estudios universitarios. Nes actuales circunstancies non solo nun entra naide nuevu sinón que tán quedando fuera los que yá taben trabayando.

La principal consecuencia de l’actual propuesta de la Conseyería ye l’establecimientu d’unes condiciones que xeneren mayor inestabilidá llaboral, obligando al personal interín a xugase’l so puestu en cada procesu selectivu. Esto ye más perverso si tenemos en cuenta que les convocatories, especialmente cola normativa actual, queden nunes poques places que solo van dexar consolidar el so puestu a unos cuantos.

Esta inestabilidá va afectar tanto a los que trabayen anguaño como a los que nun futuru algamen un pestu d’interinidá. Tener trabayu nesta alministración nun va dexar facer planes vitales pal futuru, solo va suponer formar parte d’esa enorme bolsa de trabayadores en precario que se ta construyendo nel nuesu país. Derechos consolidaos como’l cobru de trienios o sexenios van ser solo algamables dempués d’años de rotación nos que delles veces trabáyase y delles veces non.

Si la Conseyería d’Educación quier empecipiar un procesu de negociación cola intención real de llegar a un alcuerdu cola parte social, creemos que nun tendría d’ufiertar daqué que fai recular n’estabilidá al colectivu interín sinón bien al contrariu entamar una rueda de diálogu p’avanzar na calidá del empléu, teniendo en cuenta que tal cosa siempres va redundar en beneficiu del propiu sistema educativu.

Dende SUATEA non solo contemplamos nun recular al respective de la situación actual, sinón que consideramos qu’esta pue ser la oportunidá d’ameyorar munchos de los aspeutos que regulen a esti profesoráu. Non solamente pidimos que se dixebre la permanencia nes llistes de los procesos selectivos, que se tengan en cuenta les notes más favorables o que la esperiencia sía l’elementu principal a la hora d’escoyer a los y les trabayadores, sinón qu’han de metese midíes que:

• Compensen la desigualdá frente a la protección d’otres CCAA colos sos propios interinos
• Que se dexe la posibilidá meyora de puestu cuando nun salen toles vacantes na primer convocatoria del cursu
• Qu’igüen la discriminación que sufre la especialidá de Primaria  a la d’aportar a les tutoríes
• Que s’esclarie la situación de les especialidaes nes que los interinos formen parte de bolses y non de llistes por nun ser convocaos nunca a procesos selectivos
• …..

En definitiva, trátase de restablecer el xacíu común, el diálogu ensin presiones y abordar la xestión, funcionamientu y condiciones llaborales del profesoráu interín coles mires d’ameyorar el Sistema Educativu, yá que too ello tendría de formar parte del interés global en construyir un serviciu públicu de calidá al serviciu del conxuntu de la ciudadanía.

Uviéu, 2 d’abril de 2014

Ver semeyes de la concentración