Home > Comunicaos > Pola consolidación nel empléu del personal interino

Pola consolidación nel empléu del personal interino

La Confederación Intersindical y los STEs-i esixen al Gobiernu que dea prioridá a l’afitamientu nel empléu de les persones n’abusu de la temporalidá

La Comisión de Función Pública del Senáu aprueba una Moción qu’encamienta al Gobiernu a entamar les acciones normatives que sían necesaries, inclusive llexislatives, pa promover una verdaderu afitamientu alministrativu de los emplegaos públicos temporales en fraude de llei.

Pa la Confederación Intersindical y los STEs-i ye un fechu constatáu que la Sentencia del Tribunal de Xusticia de la Unión Europea (TJUE) de 19 de marzu de 2020, marcó un enantes y un dempués nes perspectives del colectivu de personal interino o n’abusu de temporalidá de les Alministraciones Públiques y que, nel sector d’enseñanza, onde l atasa d’interinidá supera el 30% de les plantiyes, afeuta a más de cien mil profesoras y profesores interinos.

La sentencia del TJUE, amás de poner n’evidencia que la práutica, por aición o por omisión, de les Alministraciones, de caltener porcentaxes altos de temporalidá nes sos plantiyes contravién les normes de la UE sobre trabayu a tiempu determináu, pon en claro qu’hai d’introducir reformes llegales pa establecer mecanismos de prevención y sanción del abusu de la temporalidá, y tamién pa  compensar el perxuiciu causáu a esti personal.

Les consecuencies d’esti pronunciamientu nun tardaron en facese evidentes. Per una parte, abrióse una batalla xudicial pa facer efeutiva la reconocencia del derechu del personal n’abusu de temporalidá a la estabilidá y permanencia nel empléu; pero, per otra, xeneróse un cambéu d’actitú nes instituciones con capacidá llexislativa que pasaron de negar o ponese de cantu énte’l problema, a plantegar iniciatives llexislatives na busca de soluciones coleutives y permanentes; oxetivu que, claramente, nun debe nin pue algamase pela vía xudicial.

Nesti sen, la Comisión de Función Pública del Senáu aprobó ayeri por unanimidá, una Moción con cambeos, presentada pol PAR, encamentando al Gobiernu a entamar les iniciatives normatives o llexislatives necesaries pa promover un afitamientu alministrativu de les emplegaes y emplegaos públicos temporales en fraude de llei. Una iniciativa que, en términos similares, tamién se va aprobar dientro poco nel Congresu.

Pa la Confederación Intersindical, esta Moción, a pesar de l’ambigüedá del testu final, supón un pasu p’alantre pa la reconocencia d’una situación fraudulenta, de facto, d’una gran parte del personal temporal nes AAPP y del derechu d’esti personal interino o n’abusu de temporalidá a consolidar l’empléu.

Sicasí, esta ambigüedá, en parte calculada, oblíganos a la Confederación Intersindical, como organización sindical con una llarga tradición de defensa del personal interino y temporal en fraude de llei, a plantegar delles considerancies que tienen de rexir cualquier iniciativa al respective d’ello; dexando claro que, d’entrada, nun se cierra la puerta a cualquier fórmula que, efeutivamente, suponga una solución al problema de la temporalidá.

Pa ello ye menester que les iniciatives normatives o llegales s’enceten con urxencia, de mou que s’eviten los efeutos negativos que pa esti colectivu tienen les ufiertes estraordinaries d’estabilización del empléu convocaes a como consecuencia del Alcuerdu pa la Meyora del Empléu Públicu, robláu pol Partíu Popular y los sindicatos CCOO, CSI-F y UGT en 2017. Porque, como dexó perclaro’l TJUE, nin suponen una sanción pa les alministraciones incumplidores de les normes europees nin, muncho menos, constitúin un mecanismu de compensación pal personal oxetu del abusu de la temporalidá.

Per otra parte, cualquier procedimientu d’afitamientu tien de tener por oxetu a les persones qu’ocupen temporalmente places estructurales en fraude de llei y non a les places en sí mesmes consideraes. Amás, tien de rescatase a aquelles persones que, coxunturalmente, perdieren esa condición de resultes de procesos reglamentarios de provisión de puestos de trabayu o polos amenorgamientos de plantiya de resultes de les polítiques de retayu de los servicios públicos, llevaes a cabu nos últimos años. Por too ello, impónse la necesidá d’afitar criterios arrogantes pa la determinación de les places oxetu d’afitamientu.

A lo último, estremando ente les midíes que tengan de resolver el problema de l’alta tasa de temporalidá actual, d’aquelles que tengan una finalidá preventiva y sancionadora, hai qu’introducir nel Estatutu Básicu del Emplegáu Públicu cambeos que recueyan mecanismos efeutivos preventivos y sancionadores pa les Alministraciones Públiques incumplidores.

Si se dan estes condiciones, los STEs-i la Confederación Intersindical va tar a disposición pa da-y la nuesa collaboración y sofitu; pero, si non, nun vamos duldar en poner los medios necesarios que tean  na nuesa mano pa que se cumpla la máxima de: amenorgar la temporalidá consolidando a les persones oxetu de fraude de llei ensin que naide quede atrás en camín.

Confederación Intersindical  14 d’ochobre de 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344