¡Pol afitamientu del empléu públicu. Basta yá de precariedá. Fixeza, yá!

Esta entrada está disponible en: Castellano (Castellanu)

La última selmana de mayu aconceyó la Mesa Xeneral de les Alministraciones Públiques. Naquella xunta, l’Alministración presentó un borrador de documentu pa modificar l’art 10 del EBEP que desenvuelve definición, tipoloxía y causes de cese del personal interino. Posteriores declaraciones vinieron precisar la gravedá del asuntu al señalar la posibilidá d’abrir un procesu de ceses de personal interino y conxelación y amortización de les sos places, lo que significaría la destrucción de miles de puestos de trabayu.

El problema de la estabilización del empléu públicu en condiciones de precariedá convirtióse nun asuntu de creciente protagonismu. A ello contribuyeron les abondoses movilizaciones entamaes per miles de persones que s’atopen nuna situación de desamparu marcada pol encadenamientu de contrataciones n’abusu de temporalidá, los encamientos xurídicos que lleguen de la xusticia europea y les declaraciones de diversos políticos, tanto estatales como autonómicos, que plantegen la necesidá de buscar fórmules pa finar coles situaciones d’interinidá.

Convién recordar que tamos falando d’un problema qu’afecta a mamplén de miles de persones a nivel estatal.Nel casu de Asturies calcúlense 12.000 persones n’interinidá de les cualos 4500 lo son nel ámbitu docente. Esta situación ye la resultancia de les propuestes polítiques aplicaes por diversos gobiernos, de distintu color políticu, que mientres años aplicaron retayos y sometiéronse a los encamientos d’orientación neolliberal qu’aportunen na necesidá d’endelgazar l’Estáu, ente otres razones pa facilitar procesos de privatización. 

Agora, cuando l’Estáu s’atopa arrodiáu poles movilizaciones y les diverses sentencies europees que-y encamienten resolver esti problema de forma urxente, empiecen a buscar midíes. Llevamos meses escuchando declaraciones de Juan Cofiño nes que s’aportuna na necesidá de regularizar la situación, dexando cayer la idea de que la solución pasa por un procesu d’afitamientu de les places por aciu convocatories masives de procesos selectivos que pueden llevar a que miles de persones que lleven años desenvolviendo’l so trabayu neses places vacantes se vean cesaes automáticamente y empuestes  al paru.

Pa la Confederación Intersindical y SUATEA, trátase d’una agresión llaboral ensin precedentes a los derechos del personal temporal ya interno. La posibilidá de qu’esta propuesta- borrador se concrete n’actuaciones llegales a lo llargo d’esti branu oblíganos a denunciar de forma contundente esta amenaza.  Esti ye’l motivu pol que dende la Confederación Intersindical, de la que SUATEA forma parte,  convoque una fuelga en toles Alministraciones públiques el 18 de xunu.

Esiximos la retirada inmediata de la propuesta presentada pola Alministración y l’apertura d’una negociación na que participen el conxuntu d’organizaciones sindicales presentes nel sector públicu y los colectivos de personal temporal ya interino. Denunciamos l’actitú de los sindicatos mayoritarios (CC.OO, UXT y CSIF) qu’apuesten por una solución que pasa pola estabilización de les places ensin tener en cuenta los derechos de les persones que sufren situaciones d’abusu de contratación.

                         Asturies xunu 2021

Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757