Home > Profesoráu > Profesoráu interín > Plataforma Estatal pola consolidación y establilidá del P. Interino

Plataforma Estatal pola consolidación y establilidá del P. Interino

CONSTITÚYESE LA PLATAFORMA ESTATAL POLA CONSOLIDACIÓN Y LA ESTABILIDÁ DEL PROFESORÁU INTERÍN (PECEPI)

Ante la problemática d’inestabilidá nel empléu del Profesoráu Interín de la Enseñanza Pública non universitaria y la incertidume que xenera nel colectivu interín l’actual coxuntura política, la Confederación de STEs-interindical, a la que pertenez SUATEA, empecipió conversaciones con distintes asociaciones, organizaciones y colectivos de profesoráu interín de tol Estáu. Tres dellos alcuentros y cambeos d’impresiones, alcordóse constituyir la “Plataforma Estatal por la Consolidación del Empleo del Profesorado Interino” (PECEPI), que va tar integrada pola Confederación de STEs-Intersindical, la FEDI (Federación Estatal de Docentes Interinos), el colectivu NAD (Nuevu accesu Docente), AIDA (Asociación d’Interinos Docentes d’Andalucía), PAEP (Plataforma Andaluza de la Educación Pública), PADEI (Plataforma Andaluza en defensa de la Educación Infantil), AFID (Asociación de Funcionariado Interín Docente-CV) y CPI-PV (Coordinadora del Professorat Interí del País Valencianu).

L’oxetivu de la Plataforma ye crear un espaciu d’alderique y de concienciación del colectivu interín qu’unifique la llucha pa la consecución de los cambeos lexislativos necesarios que faigan posible la funcionarización del colectivu. Pa ello, defendemos l’establecimientu d’un procesu d’afitamientu de los sos puestos de trabayu como funcionarios y funcionaries de carrera al traviés d’un sistema d’accesu diferenciáu a la Función Pública Docente.

El Profesoráu Interín ocupa places vacantes estructurales nos centros públicos d’enseñanza, lo que supón un mal usu del conceutu llegal d’interinidá y un fraude de llei. La solución tien que ser xusta y, pa ello, tien de contemplar necesariamente que naide pierda’l so empléu al traviés d’un sistema d’ingresu que garantice l’alquisición total de la condición de funcionarios y funcionaries docentes. Namá se precisa voluntá política pa poner en marcha les midíes necesaries, pues el mesmu EBEP establez fórmules pa faer posible esti oxetivu. Amás, mientres se consigue un sistema d’accesu estremáu como personal funcionariu de carrera, la solución tien de contemplar l’establecimientu de planes d’estabilidá pa tol colectivu y la recuperación de los empleos perdíos por causa de los retayos educativos y del deficiente funcionamientu de les llistes y bolses d’empléu en munchos territorios.

Dende esta Plataforma yá se fixo un llamamientu al Gobiernu del Estáu, al Ministeriu d’Educación, Cultura y Deporte, a los grupos parlamentarios del Congresu de los Diputaos y de les Comunidaes Autónomes pa encetar el grave problema que supón qu’una cuarta parte del profesoráu del sistema públicu non universitariu d’enseñanza tea en condiciones de precariedá llaboral por cuenta de la so condición d’interinidá, condición que ye menester superar non solo por razones de xusticia llaboral sinón pola meyora de la calidá del sistema públicu d’enseñanza. Pa ello, ye necesario que s’empecipien procesos de negociación pa que puedan alquirir la condición dafechu de funcionaries y funcionarios de carrera.

La Plataforma alcordó tamién que ye fundamental trabayar de forma coordinada en tolos territorios del Estáu Español y siguir denunciando la problemática a nivel políticu, sindical y social. Tamién, constitúi un oxetivu fundamental siguir concenciando al colectivu y a la opinión pública, proponiendo asamblees territoriales  que fortalezan la movilización del profesoráu interín pa consiguir los fines propuestos.

Colectivos y Organizaciones qu’integren la PECEPI: FEDI (DÍA, ADIA, ADI-CLM, Plataforma de Profesores y Maestros Interinos de Madrid y AIDMUR), CPI-PV, AFID-CV, NAD, AIDA, PAEP, PADEI y Confederación de STEs-intersindical

Esta entrada tamién se puede consultar en: Castellanu