Pichi, es el chulo que recorta

SUATEA entama una campaña p’acabar col esmantelamientu del enseñu públicu.

Dirixiráse a los grupos parlamentarios pa que los presupuestos nun sigan castigando la educación pública.

¡Valió d’esmantelar l’enseñu públicu!

Los presupuestos xenerales del estáu siguen plantegando pal añu que vien la conxelación salarial incrementando d’esta manera hasta’l 25% la perda de poder alquisitivu en 5 años. Nun van reponese más que’l 50% de les xubilaciones. Auméntase la carga de trabayu y mantiénse’l Real Decretu Llei 14/2012 de racionalización del gastu n’educación (qu’impón cada vez más xeres, más alumnáu qu’atender, menos tiempu pa la preparación de les clases…). Elimínense los programes d’apoyu y de llucha contra l’abandonu tempranu y el fracasu escolar.

Estes midíes inxertes nel Proyectu de Presupuestos Xenerales del Estáu enmárquense nos compromisos alquiríos pol gobiernu de Rajoy y del so ministru Wert de reducir el PIB destináu a educación hasta un 3’9% nel 2017. Solo hai partíes presupuestaries p’aplicar la LOMCE y pa conciertos y subvenciones a la privada.

N’Asturies los presupuestos nun pueden siguir dexando a un llau l’enseñu públicu y avanzar na privatización del sistema educativu.

Deben priorizase les inversiones en materia educativa, garantizando una xuba salarial llinial pa tolos y toles trabayadores del enseñu que permita recuperar lo perdío. Amás, el gobiernu asturianu debe facer efectivu’l pagu de los 44 díes devengaos de la extra del 2012 asina como del restu enantes qu’acabe l’añu.

No que cinca a la disminución de la plantiya, tien que reponese’l 100% de les places de les xubilaciones de los últimos 5 años. Les tases del profesoráu interín lleguen n’Asturies a un 25% del total de docentes faciendo imprescindible la convocatoria d’ufierta pública d’emplegu con calter inmediatu. Estes oposiciones tienen que ser tresparentes y realizase con garantíes p’acabar cola inestabilidá llaboral de los equipos docentes y cola precariedá que supón tener más de 900 medies xornaes.

L’aplicación del Real Decretu Llei 14/2012, enantes mencionáu, ye la sida de la que se ta mandando la Conseyería d’Educación asturiana pa incrementar la carga llectivo al profesoráu y el númberu d’alumnáu en cada clase. Pero n’Asturies podíen aplicase midíes que significaren una meyora de les condiciones llaborales si la Conseyera tuviese la intención de facelo. Una d’elles sedría la reducción horaria pa mayores de 55 años (talo como figura na LOE) y otra sedría la contratación de tol profesoráu necesariu p’acabar cola situación insostenible d’anguaño.

Dende SUATEA pidimos a la Xunta Xeneral que llexisle pa meyorar eses condiciones llaborales y pa entamar un plan de meyora de los centros escolares, teniendo en cuenta que munches de les instalaciones tán obsoletes.

La LOMCE y la privatización tamién n’Asturies

La situación d’anguaño fae más necesario la esixencia de derogar la LOMCE asina como un incrementu de la dotación presupuestaria qu’algame’l 7% del PIB pa educación. Ye esti un momentu nel que’l mantenimientu de la rede privada d’educación financiada con perres públiques resulta insostenible dada la bayura d’argumentos pa la derogación de los conciertos.

Llamentablemente la Conseyería d’Educación Asturiana paez dir na llinia contraria. Un exemplu claru tenémoslu col Consorciu pa la xestión del enseñu del primer ciclu d’Educación Infantil (0 a 3 años) que presentaron va poco. Habiendo la posibilidá d’integrar na rede pública esti enseñu, tírase por una midía privatizadora como ye la creación d’una Llei de Consorciu, que nun respuende a les demandes de quien defendemos l’enseñu públicu.

Dende SUATEA facemos un llamáu al profesoráu a participar nes movilizaciones en defensa del enseñu públicu y contra los recortes del ministru Wert y de la conseyera González.