Pepe Gotera y Otilio asitiaos na Conseyería d’Educación

Dende SUATEA queremos denunciar la complexa situación que se ta viviendo nos centros educativos asturianos tres la implantación d’un nuevu sistema de xestión económica de los mesmos.

Dende los primeros díes de cursu, tamos recibiendo llamaes dende los centros nes que se nos tresmite’l malestar esistente nos equipos directivos énte les dificultaes que xenera la xestión cotidiana del nuevu programa, GiCe, que regula les actividaes económiques de los centros educativos.

Hasta’l cursu pasáu, les actividaes económiques taben xestionaes pol programa GECE. Al entamu del branu informóse de la sustitución de d’esi programa por una nueva aplicación, GiCe, encargada de regular eses actividaes.

Na Circular d’entamu cursu recuéyese la introducción del nuevu sistema contable que va tener de ponese en marcha con vistes a la ellaboración de la xestión añal que se cierra con fecha 31 d’avientu.

Una vegada enllantáu GiCe, comunícase a los centros la organización d’un cursu de formación dirixíu a les persones qu’asumen les funciones de secretaria o secretariu nos equipos directivos. El desenvolvimientu del cursu foi un auténticu fiascu nel que nun funcionaben los ordenadores, el tutorial apurríu contenía errores y yera incompletu, semando más incertidumes que certidumes ente los cursillistes. Nun dexa de ser llamativa esa idea d’empezar la casa pel teyáu. Primero camudamos el sistema de xestión y dempués ufiertamos la formación necesaria pal so usu.

Anguaño, atopamos con una complicada situación cuidao que tres la introducción del programa GiCe tán produciéndose numberoses incidencies colos pagos dende los centros a los distintos provisores, xenerando un creciente malestar tanto ente les direcciones de los centros educativos como ente el provisores. Nun pueden faese les compres necesaries nin pueden liquidase parte de les factures pendientes, fechu qu’afecta negativamente a los comercios de proximidá que suelen ser quien de normal s’encarguen d’atender les necesidaes de los colexos ya institutos.  Dende SUATEA llamentamos esta situación que nos paez una chambonada digna de Pepe Gotera y Otilio.

Uviéu 29   d’ochobre 2019