Home > Profesoráu > Profesoráu interín > Peligra l’emplegu interín si s’aprueben los Presupuestos

Peligra l’emplegu interín si s’aprueben los Presupuestos

LOS PRESUPUESTOS XENERALES DEL ESTÁU (PXE) AMUESEN EL DESPRECIU DEL GOBIERNU POLA EDUCACIÓN Y POR EL SECTOR PÚBLICU

La pequena xubida de les partíes presupuestaries destinaes a Educación escuende una realidá esmolecedora: el porcentaxe de gastu educativu en comparanza col PIB amenorgóse drásticamente.

Nunca se destinó menos porcentaxe del PIB a esta área, al pasar del 4,01% en 2016 al 3,93% previstu pa 2017. Y nes previsiones pal añu 2020, unviaes pol Ministeriu de Facienda a Bruxeles, ye entá peor, valorando esti porcentaxe nun 3,67%.

Esto amuesa claramente que l’amenorgamientu del gastu públicu qu’abandera’l Ministru Montoro ta faciéndose a cuenta de sacrificar el futuru de millones de mocedá. Los retayos na educación pública caltiénense y, sicasí, aumentáronse les partíes presupuestaries pa la rede privada concertada. Según datos del Ministeriu d’Educación, la enseñanza pública recibió 7.252 millones d’euros menos en 2015 qu’en 2009, mentanto que na concertada’l gastu foi de 27 millones d’euros más.

Nun ye d’estrañar: los retayos del númberu de docentes, la desapaición de programes de sofitu educativu, l’empeoramientu de les condiciones llaborales del profesoráu súfrense nos centros y vense reflexaes nes cifres del gastu educativu, etc. Amás, estes cifres van comprometer la calidá de la enseñanza agora y nel futuru.

Tabla I

  2009 2016 2017 2020
PRESUPUESTU EN MILLONES DE EUROS 49.692 44.640 45.603 48.133
% PIB 4,5 % 4,01 % 3,93 % 3,67 %

Evolución nos Presupuestos y % PIB n’Educación

Per otra parte, el proyectu de los PXE, nel so artículu 19.2, determina que’l  contratu del personal interino nun va poder ser de más de tres años. L’aprobación d’esta midida, que s’establez como lexislación básica estatal y d’obligáu cumplimientu pa toles alministraciones públiques, va significar  qu’un mesmu emplegáu públicu (personal temporal, personal funcionario interino o estatutario temporal) nun va poder tar contratáu por una mesma Alministración Pública per más de tres años.

Esta drástica midida va provocar el despidu de miles de persones que van ser sustituyíes por otres, esto ye, supón un apueste decidíu d’esti gobiernu por consolidar la rotación nel empléu en toles alministraciones públiques y precarizar la situación de miles de persones. Amás, supón un ataque inaceptable al sector públicu polo xeneral y a la enseñanza pública en particular, que tendrá de funcionar con plantiyes más entá más inestables y que tendrá de refugar a les persones cuando cumplan tres años de contratu. Esto va traer un empeoramientu y deterioru inalmitible de la calidá de la enseñanza al prescindir de les persones con más esperiencia. Teniendo en cuenta la tasa de profesoráu interino n’Asturies, que supera’l 30% y que supón un total de trés mil persones (Tabla II), puede implicar el despidu de la mayoría d’estes persones, que polo xeneral tuvieron contrataes más de tres años.

Si’l gobiernu nun rectifica esta propuesta, tien de saber que nun vamos quedar callaos. Dende SUATEA y la Confederación de STEs, consideramos absolutamente improcedente ya intolerable que, en llugar de consolidar nel empléu a cientos de miles de persones que lleven contrataos más de tres años (asina lo sentenció’l Tribunal de Xusticia de la Unión Europea), el gobiernu decida despidilos ensin más, lo que va suponer un ERE masivu en tol sector públicu, que, nel casu d’enseñanza, va afectar a más de cien mil persones.

Tabla II

CUERPU VACANTES XORNADA COMPLETA VACANTES MEDIA XORNADA TOTAL PROFESORÁU INTERINO PORCENTAXE INTERINIDÁ PORCENTAXE MEDIES XORNAES
MAESTROS 1.162 462 1.624 30,1 % 28,4 %
SECUNDARIA 736 486 1.222 26.7 % 39,7 %
TOTAL 1.898 948 2.846 28,5 % 34 %

 

Datos del profesoráu interino sacaos de les 3 primeres convocatories de places nel presente cursu 2016/2017.

Esta entrada tamién se puede consultar en: Castellanu