Home > Aición sindical > Otru ataque más contra la Escuela Pública

Otru ataque más contra la Escuela Pública

Esti pasáu 2 de xunu, nes páxines del diariu La Nueva España, que se autodenomina “diario independiente de Asturias”, publicóse una noticia que solo paez sacada del manual d’ataques cíclicos contra la Escuela Pública.

Nesta ocasión, el citáu diariu recueye les declaraciones de distintes academies privaes d’enseñanza nes que lleemos afirmaciones que nun pueden dexar indiferente a naide que defenda los servicios públicos nesta sociedá; son aseveraciones qu’intenten dar una imaxe nefasta del profesoráu del sector educativu públicu, atacando la so profesionalidá y el so trabayu en pro del alumnáu.

Acusa al conxuntu del profesoráu de la Escuela Pública de nun tar trabayando, de nun querer trabayar y de nun tener organización.

Dende’l sindicatu SUATEA, nun podemos dexar pasar esti ataque, claramente interesáu, contra’l nuesu sistema educativu públicu. Negamos, dafechu, eses acusaciones y esperamos que’l citáu diariu les rectifique o, siquier, dexe exercer el derechu de retruque pa poder esponer la nuesa opinión y denunciar los intereses que s’escuenden detrás de la mesma, que nun son otros que los del sector d’academies privaes, que se sienten perxudicaes ante la decisión oficial de dar per rematáu’l cursu escolar y, amás, los intereses de la Escuela privada y privada concertada nun momentu nel que se ta abriendo’l periodu de matriculaciones pal cursu 2020-21.

La Escuela Pública asturiana apóyase nel trabayu profesional de los sos docentes. Convién recordar que foi esti personal docente quien punxo nesta situación d’escepcionalidá tolos medios pa llegar al cien per cien del alumnáu y por atendelos lo meyor que pudieron nestes circunstancies. La Escuela Pública atiende a tola diversidá social esistente n’Asturies, a toles clases sociales, al alumnáu del mundu rural y del mundu urbanu y failo, siempres, respetando los sos ritmos d’aprendizaxe.

De la Escuela Pública asturiana salen, añu tres d’añu, resultaos espectaculares na prueba de la EBAU y el nuesu alumnáu demuestra cola so proyección posterior una bona preparación, non solo académica, sinón tamién ciudadana y social.

Nestos momentos d’escepcionalidá, el personal docente de la Escuela Pública, como tien que ser, siguió fielmente les normes y encamientos de la Conseyería d’Educación. La organización de los currículos, de les clases a distancia, del acompañamientu emocional del alumnáu fíxose como correspondía, amás, con munchu esfuerzu tanto en medios como n’horarios que quedaron totalmente desregularizaos.

Atacar a la Escuela Pública nun puede tener namás que una intencionalidad mercantilista y monetaria. Cuando s’anuncia un resultáu catastróficu, como se fai na noticia, impúlsase como solución de forma inequívoca, la opción pola Escuela privada y la Escuela privada concertada. Nun ye de recibu un ataque a costa fecha y ensin fundamentu como’l que se publicó nesi diariu. Cola publicación d’esa noticia, fáltase al respetu a tol profesoráu del sector públicu, daqué que manca y que duel en momentos como’l presente, nel que la nuesa mayor esmolición ye la de poder llegar a tol alumnáu, tamién al más desfavorecíu y en situación de vulnerabilidá.

Dende SUATEA, nun entendemos cómo puede dase pábilu a esti tipu de declaraciones que, claramente, estropien la imaxe d’un serviciu públicu que tien nel profesoráu la so meyor baza y que trabaya, de manera profesional, coles mires d’equilibrar desigualdaes nesa sociedá.

Uviéu 3 de xunu de 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348