OPOSICIONES: Una otra incoherencia de la nuestra Conseyería d’Educación

La precipitación ye mala conseyera, y nun falamos de la Sra. Responsable d’Educación. Decímoslo pol desenrollu de la Ufierta Pública d’Emplegu qu’entamó esti llunes 22 de xunu atrás.

A la incongruencia de tener tribunales con más de 200 persones opositando, disgregaes por un cientu d’aules de los institutos asturianos, de tener que disponer de la presencia física de les persones suplentes y reserves pal cuidáu de les dos partes de la primera preba de la fase oposición… axuntaríemos la que nestos momentos ta socediendo.

La llectura de les 2 partes entamó hoi, y da dándose la situación de que nos institutos onde se ta lliendo inda hai actividá académica, yá que nun remató’l períodu llectivu pa los estudiantes de secundaria. Esto ta produciendo que, nun momentu crucial, pal colectivu de profesoráu interín, onde se tán xugando una gran parte del so futuru llaboral y personal, existen unes condiciones de barullu y interrupción qu’obstaculicen el normal desenvolvimientu d’esta fase de la oposición.

Pesie a les reiteraes peticiones de dellos equipos directivos de suspender l’actividá académida los díes 24 y 25 de xunu (día que finaliza’l cursu escolar oficial en secundaria), l’Alministración mira pa otru llau, yá que, nun ye’l so problema, sinon del profesoráu interín que tien que sobreponese a la esperiencia de superala pa esbrozar el so futuru, inda ensin disponer de les condiciones mínimes pa facelo efectivo.

SUATEA esixe a la Conseyería d’Educación que tenga en cuenta al colectivu de profesoráu interín y dea les condiciones mínimes pa un desenrollu correctu y afechiscu d’esti procesu selectivu.

Secretariáu de SUATEA

Uviéu, 24 de xunu del 2015