Home > Profesoráu > Profesoráu interín > Convocatories > Oposiciones: Modelu agotáu.

Oposiciones: Modelu agotáu.

 

A lo llargo d’esta selmana acabaron los procesos selectivos puestos en marcha pola Alministración educativa asturiana que se vinieron   desenvolviendo dende’l 23 de xunu y del que queda pendiente tovía la proclamación oficial de les persones escoyíes finalmente.

Dende SUATEA consideramos que llegó’l momentu defacer una reflexón y un analís tranquilu de tou esti procesu, tanto no que se refier al ámbitu del Ministeriu d’Educación – qu’impunxo un Real Decretu d’accesu que naide quería -, como nel ámbitu asturianu, qu’una vegada más repite la falta d’interés de l’Alministración pa que’l procesu selectivu ufierte garantíes de tresparencia y oxetividá pa les persones aspirantes.

No que se refier al Real Decretu d’accesu, queda patente la necesidá de modificar el sistema d’oposiciones. Tratar d’un sistema obsoletu que prima les conocencies teóriques y memorístiques frente a la capacidá pedagóxica y l’esperiencia docente, unes competencies que les persones aspirantes nun pueden demostrar con esti sistema porque establez ser eliminaos si nun se supera la primer parte teórica. Por esta razón dende los  STEs-i solicitemos la convocatoria urxente de la Mesa sectorial del MECD p’analizar en fondura los defectos del sistema.

No que se refier a les oposiciones entamaes pola Conseyería d’Educación celebraes n’Asturies, creemos qu’asocedieron ciertos desaxustes que detallamos de siguío:

Referío a los tribunales, dende SUATEA queremos tresmiti-yos el nuesu sofitu, porque  realizaron esta ingrata llabor nunes condiciones bien precaries: empiezu de procesos selectivos ensin terminar el cursu nos centros; trabayu a estaya y xornaes interminables de más de 12 hores pa cumplir colos plazos y condiciones que-yos fueron impuestes pola Alministración, too ello compenssao con dietes ridícules que nun algamen los 50 euros al día, etc.

En cuanto al desenvolvimientu y resultaos de les oposiciones n’Asturies, munchos de los problemes que surdieron yeren previsibles y por esta razón SUATEA presentó una serie de propuestes de meyora de les bases de la convocatoria, que lamentablemente nun fueron teníes en cuenta.

–           Los criterios de corrección y de calificación yeren tan xenerales y básicos que se dio la paradoxa de qu’hubo diferencies sustanciales nos criterios aplicaos polos tribunales d’una mesma especialidá, lo que supón qu’haya xente que se sienta más perxudicada pol fechu de tar nun tribunal u otru.

–           Nun se permitió la revisión de los exames acabante la primer prueba tal como propunximos dende SUATEA, magar que trátase d’una fase eliminatoria qu’implica nun continuar nel procesu nel supuestu si nun s’aprueba. La reclamación a la nota déxase solo a la fin, pero los aspirantes nun pueden ver los sos exames y los criterios de calificación aplicaos.

Llámanos l’atención esta situación d’opacidá que contrasta colos criterios de tresparencia esixíos oficialmente y que los mesmos docentes apliquen a lo llargo del cursu col so alumnáu al ufiertar esplicaciones, atender reclamaciones, enseñar exames ya inclusive apurrir copia de los mesmos. Nun ye la primer vegada que la Conseyería maltrata a los sos propios docentes a quien estrume al máximu pol cursu pa depués nun corresponder cola mesma delicadeza.

–           El númberu de suspensos na primera prueba foi bien eleváu. Dase la circunstancia de que, en dellos casos, yá nesta fase primera hubo menos aprobaos que places ufiertaes. Los aspirantes quéxanse de la escesiva durez de la prueba práctica y de la falta de tresparencia del procesu y de los criterios de calificación aplicaos a los que yá fiximos referencia.

–           Nun se garantizó l’anonimatu de les persones aspirantes nes pruebes escrites, tal como se fai na mayoría de les CCAA, máxime nuna Comunidá pequeña como l’asturiana con una elevada probabilidá de coincidencia nel mesmu tribunal de persones que se conocen por coincidir enantes nel llugar de trabayu, por señalar dalguna posibilidá.

–           Quedaron un total de 51 places ermes, daqué malo d’entender nun procesu en qu’alleguen más de seis mil persones. Por señalar dellos casos llamativos, habría que falar d’especialidaes nes que quedaron ermes la metá de les places ufiertaes, como en bona parte de les especialidaes correspondientes a Formación Profesional (Procesos y Medios de Comunicación, Cocina y Pastelería, Estética o Mantenimientu de Vehículos) o en Matemátiques onde queden ermes quince places.

Tamos en condiciones de facer un primer analís referíu al impactu que pueda tener esti procesu selectivu y señalar que sirvió pa garantizar la estabilización nel trabayu d’una serie de persones ente les que s’atopa un númberu significativu de personal interino hasta’l momentu y felicitamosnos por ello. Sicasí, tamién tamos en condiciones d’asegurar que va haber otru grupu de persones que se queda fuera y de xuru tenga qu’encarar una complicada situación personal y llaboral col entamu del cursu 2018-2019. Va haber qu’esperar a l’axudicación de places d’agostu pa poder comtrastar los datos reales y tener una idea más axustada del impactu final. Sía que non, dende SUATEA creemos que tamos ante un modelu de selección agotáu, tanto poles condiciones escluyentes de la manera d’accesu como polos defectos señalaos nel desenvolvimientu prácticu de la prueba.

 

Uviéu 20 de xunetu 2018

Esta entrada tamién se puede consultar en: Castellanu