Oposiciones docentes: equidá, oxetividá y realidá

Tres conocer, en marzu, que l’alministración del Principáu d’Asturies decidiere facer la ufierta d’emplegu públicu nel ámbito educativu, disparárense les espectatives y ilusiones de munches persones que, dende dientro o dende fuera del sistema, aspiren a formar parte de los cuerpos docentes n’Asturies.

Como en casa del probe dura poco’l pan, les primeres decepciones llegaron bien llueu, poques places, indefinición nos criterios, refugu de les propuestes plantegaes pol SUATEA…

El nuestru plantegamientu, igual que n’ocasiones anteriores, foi demandar el 100% de les places amás de cuestiones como: sortéu únicu pa tolos tribunales de la mesma especialidá, publicación de los criterios de calificación, corrección o valoración, garantizar l’anonimatu, nun repartir places por tribunales, establecer los mecanismos necesarios de revisión o reclamación, entrega de les programaciones después de facese públicos los resultaos de la primer preba, eliminar la figura del voluntariu pa evitar que se “cuelen” preparadores nos tribunales o establecer una preba de conocimientos sobre la nuestra comunidá autónoma, tal y como se fae n’otros territorios.

Amás de la escasa receptividá de l’alministración p’aceptar n’aquel momento les propuestes mencionaes, atopámosmos agora con un procesu que dista muncho de tener la tresparencia y axilidá que-y correspuendería.

La primer sospresa aporta cola publicación d’una ratio d’opositores por tribunales que ta lloñe de facilitar la necesaria oxetividá a la hora d’axudicar les calificaciones. Por respetu a les persones que se tán xugando’l so futuru llaboral después de meses d’esfuerciu y dedicación, y por consideración al profesoráu que va tener la xera d’evaluar a más de 6.000 aspirantes, l’alministración debería reconsiderar el númberu de tribunales que propón, de manera que se permitiera tener tiempu abondo pa ser quien a valorar de manera xusta a tolos que s’esaminen, ensin la presión de ver cómo s’allarga’l procesu y se fae estenuante pa tolos implicaos.

D’otru llau alcontrámosmos coles filtraciones de les sedes y de les feches d’entamu de les prebes. Bilordios que nun sabemos si tienen realidá o non pero que xeneren desconciertu y contribuyen a crear un clima d’escurantismu que nun ufierta la confianza y la seguridá de la que se deben mandar unes oposiciones a la función pública. L’alministración tien que publicar toes estes cuestiones y axilizar la información necesaria pa que prime la tresparencia y nun propicie l’oportunismu de dalguna organización sindical que “viende” esta información como si tuviese dalgún privilexu nel acceso a la mesma.
Pa rematar, dende SUATEA queremos recordar que dalgunos d’estos problemes colos que nos alcontramos son consecuencia directa de actual alcuerdu d’aspirantes a interinidá. Obligar a realizar la matrícula (y pagar les tases correspondientes) en toles especialidaes a les que se pertenez pa nun decayer de les mesmes o la imposibilidá d’ampliar los perfiles profesionales a los que quixeren presentase a otra especialidá distinta a la llista de la que formen parte son torgues que xustifiquen la derogación d’esi alcuerdu y abrir un procesu participativu que defendan la estabilidá, tanto de los que yá tán dientro del sistema como de los que vayan entrando d’equí p’alantre.

Uviéu, 21 de mayu del 2015

Información sobre’l procesu d’Oposiciones 2015