Oposiciones 22: errores, precipitación y minusvaloración de la esperiencia

Esta entrada está disponible en: Castellano (Castellanu)

Güei llunes, 18 d’ochobre, celebróse una xunta ente la Conseyería d’Educación y los sindicatos de la Xunta de Personal Docente pa informar de la corrección d’errores graves cometíos na convocatoria del procedimientu selectivu d’accesu al Cuerpu de Maestros que se publicó’l pasáu 28 de setiembre por aciu Resolución de 14 de setiembre de 2021. Según la Dirección Xeneral de Personal Docente, los cambeos débense a la necesidá d’afaese a la normativa vixente nestos momentos (Real Decretu d’accesu 276/2007, de 23 de febreru). Arriendes d’ello, queda anuláu’l periodu transitoriu d’accesu onde se sopesaba la fase d’oposición con un valor del 60% y la fase de concursu col 40% del total de la prueba, siendo sustituyído pol 66,66% y 33,33% respectivamente. Coles mesmes, el númberu de temes a escoyer na parte B de la primer prueba pasa de 3 a 2.

De caltenese los cambeos anunciaos esta mañana, va amenorgase significativamente la valoración de la esperiencia previa, pasando d’un 28 % na convocatoria anterior -celebrada en 2019, dientro del periodu transitoriu 2017-19- a un 16% na actual, que va tener llugar en 2022. Esta circunstancia afecta de manera especialmente grave a la situación escepcional d’abusu de contratación temporal que’l personal interino lleva años soportando -el periodu transitoriu nun amenorgó la temporalidá del personal docente al 8%, nin tanto, cuidao que na actualidá la cifra ronda los 4500, más del 30% de la plantiya- y que, amás, ta obligáu a participar nun procedimientu selectivu d’accesu nes  peores condiciones de la hestoria recién, que nun estrema ente personal interino en situación d’abusu y personal ensin esperiencia docente previa, y n’ausencia de midíes llexislativu-alministratives d’afitamientu nel puestu de trabayu del personal abusáu.

Énte estos fechos SUATEA plantegó los siguientes asuntos:

  • Que nun se convocó a les organizaciones sindicales con anterioridá a la publicación del Resolvimientu de 14 de setiembre, tal que se venía faciendo dende va años, pa poder realizar propuestes de meyora nes bases procedimentales de la convocatoria y alvertir de los posibles errores.  Poro,  solicitemos una nueva xunta onde plantegar estos asuntos, aceptando la Conseyería celebrala en próximes feches.
  • Que nun entendemos la precipitación na publicación de la convocatoria cuando entá se ta aldericando nel Congresu’l  proyectu de Llei de midíes urxentes pal amenorgamientu de la temporalidá nel empléu públicu (cambéu del RDL 14/2021 “Icetazu”) nel que probablemente s’estableza un nuevu períodu transitoriu enantes de rematar esti añu,  al que nun va poder acoyese’l personal docente interino d’Infantil y Primaria si nun s’aplaza o anula l’actual convocatoria. Situación que de xuru sí tuvieron en cuenta toles demás comunidaes autónomes, qu’inda nun publicaron la so convocatoria. Arriendes d’ello, SUATEA pidió l’aplazamientu de l’actual convocatoria hasta que s’apruebe la citada Llei.
  • Que ye necesario axustar un nuevu alcuerdu interinidá qu’acabe cola rotación nel puestu de trabayu, favoreciendo la estabilidá del profesoráu nos centros.

N’Uviéu a 18 d’ochobre de 2021  

Print Friendly, PDF & Email

Esta entrada está disponible en: Castellano (Castellanu)

¡¡¡ FUELGA / HUELGA !!!

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757