Home > Centros educativos > Obres d’ampliación resueltes con barracones nel IES. Roces.

Obres d’ampliación resueltes con barracones nel IES. Roces.

SUATEA esixe conocer el costu de la instalación y caltenimientu de barracones en centros educativos
La crecedera de la matrícula nel IES Roces, sostenida dende va años y con perspectives de siguir aumentando, fai necesaria l’ampliación de les instalaciones del centru. Trátase d’una zona en plena espansión demográfica que rescampla en viendo la matrícula nel Colexu Antonio Machado.

L’alministración comprometióse hai más de dos años a llevar a cabu les obres correspondientes p’atender les necesidaes derivaes de la medría de matrícula nel Institutu. Trátase d’un centru cabezaleru n’Asturies que cunta con una notable dotación de medios y qu’imparte amás ciclos formativos de Formación Profesional, lo que rique una dotación d’espacios pa cumplir cola lexislación vixente.

La Conseyería d’Educación nun cumplió les promeses feches a la comunidá educativa del IES de Roces. Les obres d’ampliación tendríen de tener empezao en 2014. Y n’esti cursu, la Conseyería en cuenta de poneles en marcha, pretende instalar módulos prefabricaos, esto ye, barracones, como yá asocede n’otros centros educativos asturianos.

SUATEA dirixóse a la Conseyería d’Educación pa preguntar por esti tema, más concretamente pol costu económicu que supondría la instalación d’estos módulos o barracones, y pa saber si éstos son propiedá de la Conseyería o pela cueta tienen d’arrendase. Na sorprendente respuesta recibida dende la Conseyería d’Educación indícasenos que la información sobre construcciones modulares en centros educativos que tengamos interés en conocer, la solicitemos al traviés del Rexistru Xeneral nun escritu empobináu a la Dirección Xeneral de Personal Docente y Planificación Educativa, pa que l’alministración pueda valorar si ye pertinente dar esta información a una organización sindical y apreciar si entra dientro de les funciones y competencies sindicales demandala.

Son yá dellos centros educativos asturianos los que recurrieron a esta midida, en principiu temporal, y qu’acaba dilatándose nel tiempu mientres años, como asocede nos casos del C.P Carmen Ruiz Tilve de La Corredoria o l’Alfonso Camín de Xixón nos que l’alumnao lleva yá dellos años utilizando barracones. Esta opción solo tendría d’aplicase en casos estremos y, llamentablemente, ta poniéndose de moda na nuesa comunidá asonsañando a la valenciana. Tales midíes inaceptables revelen una falta palmaria de planificación educativa y confirmen la urxente necesidá d’un plan de choque pa la meyora del avieyáu patrimoniu inmobiliariu escolar asturianu.

Secretariáu de SUATEA
3 de febreru de 2016

Esta entrada tamién se puede consultar en: Castellanu