Pompa militar na escuela pública

Cada vez ye más corriente qu’apaezan centros educativos que ponen como actividá obligatoria dir a un actu militar a izar la bandera del Reinu d’España. Dende SUATEA paeznos necesario reflexonar alrodiu d’ello.

Promulgáronse munches lleis educatives, 8 lleis diferentes en cuarenta años, y eso llevó a enfrentamientos políticos grandes, sobremanera a la hora de concretar les materies y los conteníos que tienen que ver colos valores democráticos. Ye asina hasta’l puntu que la derecha y la ultraderecha entamaron campañes contra la implantación d’asignatures como “Educación pa la Ciudadanía y los Derechos Humanos” y “Educación en Valores cívicos y éticos”, dende acusaciones d’adoctrinamientu hasta fobies delirantes. Por embargo, ente los fines de la educación, que recueye l’artículu 2 de la llei orgánica en vigor, tán: la formación pa la paz, el respetu a los derechos humanos, la vida en común, la cohesión social, la cooperación y la solidariedá ente los pueblos, l’alquisición de valores qu’afalen el respetu a los seres vivos; la educación nel respetu a los derechos y llibertaes fundamentales, na igualdá de derechos y oportunidaes ente homes y muyeres y na igualdá de tratu y non discriminación de les persones por razón de nacencia, orixe racial o étnicu, relixón, convicción, edá, de discapacidá, orientación o identidá sexual, enfermedá, o cualesquier otra condición o circunstancia; la preparación pal exerciciu de la ciudadanía, pa la inserción na sociedá y pa la participación activa na vida conómica, social y cultural, con actitú crítica y responsable.

Entóncenes ¿por qué s’obliga a participar nuna actividá de calter militar cuando l’alumnáu puede tener idees pacifistes? De magar en 1984 l’Estáu dio una alternativa a quien nun quería participar n’actividaes de calter militar. Cola llei d’obxeción de conciencia entendimos que, si les fuerces armaes han servir a tola ciudadanía, non tola ciudadanía tien que participar de lo militar porque eso choca cola llibertá de conciencia que garantiza la Constitución. Rendir tributu a un símbolu, anque sea un símbolu constitucional, ta malo de casar colos derechos y llibertaes polítiques y de conciencia. Y falamos de rendición de tributu porque, anque la bandera del Reinu de España yá ta presente, pente la llei, en tolos centros civiles públicos, l’actu d’izala ye un actu militar que tien un calter de reverencia ente dichu símbolu.

D’otra manera, si l’oxetivu d’esti actu ye un reconocimiento a l’actividá llaboral que desenvuelven les Fuerces Armaes, entrugámonos por qué tenemos que reconocer de manera especial una actividá llaboral y non al restu como, por exemplu, el serviciu d’ayuda a domiciliu, el d’atención primaria, el d’emrexencies, etc. ¿Igual ye que búscase emponderar los valores militares? El 9 de xunu del 2022, el Ministeriu d’Educación de Rusia aprobó una norma pente la cual insta a les escueles a que, la entamar la selmana, icen la bandera nacional y canten l’himnu. Una cosa que, según el so ministru, yá se taba faciendo en dalgunos centros educativos por iniciativa propia,…

Si se trata d’una situación pal deprendizaxe de los símbolos constitucionales, tampoco nos parez necesariu un eventu d’estes característiques, la enseñanza d’ellos yá ta recoyida n’otros contextos de deprendizaxe ensin falta d’actos militares d’exaltacíón, de la mesma manera que na asignatura d’Historia trátase de la influencia de la Historia d’España del cristianismu y del islam ensin necesidá de meter nun institutu a un cura o a un imán, nin obligar al alumnáu a participar nos sos respectivos rituales.

Dende’l SUATEA defendemos la educación pa la paz y la resolución pacífica de los conflictos y denunciamos la participación de les fuerces armaes nos centros educativos.