Nun vendemos fumu, avisamos del fueu

El pasáu 18 de xunu, SUATEA, como organización integrante de la Confederación Intersindical, convocó una xornada de fuelga pa tol personal temporal ya interino de les Alministraciones Públiques col envís de frenar la inminente reforma del EBEP propuesta pol Ministeriu de Miquel Iceta. El borrador presentáu pol Ministeriu a la Mesa Xeneral de Función Pública non solo nun apurre soluciones pal personal oxetu d’abusu na actualidá sinón que, cola complicidá de les centrales sindicales UGT, CCOO y CSIF, siguen calteniéndose les Ufiertes Públiques d’Empléu como única midida d’estabilización, ignorando, a posta, que lo que pretenden ufiertar de forma masiva son los puestos de trabayu de cientos de miles de persones que van dir a la calle.

Sicasí, la Sala de lo Social del Tribunal Supremu comunicó’l llunes d’esta selmana la nueva doctrina que va aplicar d’equí p’arriba. Esta rectificación ye una meyora importante  p’algamar la estabilización del personal temporal n’abusu de les alministraciones, yá que reconoz la situación d’abusu a partir del tercer añu de contratu o nomamientu.

Al respective de la condición de “indefiníu non fixu”, esta figura nun ta nidiamente regulada na lexislación española y amás nun ye la fayadiza pa sancionar l’abusu, yá que según indica la sentencia de 19 de marzu de 2020 del TJUE, nel so puntu 102, “l’indefiníu non fixu nun ye sanción fayadiza porque nun dexa algamar la finalidá que diz la cláusula 5 del Alcuerdu Marcu, porque esta figura “nun dexa esfrutar de les mesmes condiciones de trabayu que’l personal fixo”. 

Nesti sentíu, esperamos que la Sala de lo Contencioso del Tribunal Supremu, por analoxía cola doctrina que se va aplicar al personal llaboral, caltenga la llínea d’estabilización pal personal funcionario interino y estatutario cola figura de personal fixo a estinguise”, porque lo contrario sedría una flagrante discriminación. Hasta qu’esto asoceda, nun podemos aceutar que s’apruebe, a carrenderes, la reforma del EBEP que vienen axustando’l Ministeriu y les centrales sindicales mayoritaries, que supondría dar el llombu a lo que yá resulta obvio.

El Secretariáu de SUATEA
N’Uviéu, a 29 de xunu de 2021