Home > Comunicaos > Nun habrá oposiciones n’Asturies

Nun habrá oposiciones n’Asturies

La Conseyería d’Educación comunicó güey que esti añu nun habrá oposiciones, anque podríen aprobar Ufierta d’empléu Públicu (UEP) si la situación de los presupuestos xenerales del estáu camuda.

LA CONVOCATORIA D’OPOSICIONES NA COXUNTURA ACTUAL SEDRÍA “SUICIDA”

Na mañana de güei, 15 de marzu de 2017, convocóse a les Organizaciones Sindicales de la Xunta de Personal Docente a una xunta de calter urxente pa informar de la Ufierta d’Empléu Públicu del Cuerpu de Maestros n’Asturies. Nesa xunta comunicósenos que, como nun s’aprobaron los Presupuestos Xenerales del Estáu, anguaño nun va haber oposiciones del Cuerpu de Maestros n’Asturies. Amás, comunicósenos que , si estena’l panorama normativu, esto ye, si s’aprueben los Presupuestos xenerales del estáu (PXE), aprobaríase la ufierta d’empléu públicu (UPE) d’anguaño pa nun perder eses places, pero celebraríen les oposiciones más palantre, cuando la coxuntura sía distinta y se convoquen tamién nel restu de territorios.

Dende SUATEA, defendimos que, si realmente nun se convoquen na mayoría de los territorio, nun se tienen de convocar se tampoco n’Asturies. Compartimos les declaraciones del Conseyeru nes qu’afirmaba que sería “suicida” convocar oposiciones nestes condiciones pol efectu llamada que se provocaría. Efectivamente, tenemos de recordar al Conseyeru qu’efectivamente sedría “suicida” polos efectos devastadores que provocaría nel colectivu interín la rebaremación de llistes de resultes de l’aplicación del actual Alcuerdu d’interinidá, pues esi Alcuerdu favorez l’efectu llamada a aspirantes d’otros territorios. Si’l profesoráu interín asturiano gociara d’una cierta estabilidá, tal como pasa en Galicia, Cantabria, Euskadi, País valencianu, Andalucía, etc., ensin dala dulda, sería menos gravosa una convocatoria d’oposiciones.

Per otra parte, nel ámbitu estatal, l’actual sistema d’accesu a la función pública docente ye bien perxudicial pal profesoráu interino, tanto pol sistema d’oposiciones, bien alloñáu de la práctica docente y con delles pruebes eliminatories, como pol pocu valor que se da a la esperiencia docente na fase de concursu. Nesti momentu, nel marcu de la negociación d’un futuru Pactu educativu, paez qu’hai intención de camudar el sistema d’accesu a la función pública docente, ya inclusive de dir hacia un afitamientu del empléu interín. Por ello, entendemos que nun ye’l meyor momentu pa convocar unes oposiciones que nesti momentu podríen apurrir más daños que beneficios.

Por too ello, dende SUATEA, defendimos los siguientes planteamientos:

–    Nun se deben convocar oposiciones nesta coxuntura. Agora bien, si s’aprobaren los Presupuestos Xenerales del Estáu en meses próximos, sofitamos que, col fin de nun perder les places procedentes de la tasa d’anguaño, s’aprueben la UEP de 2017 tal como taba prevista y que la convocatoria d’oposiciones se celebre n’años próximos o cuando la coxuntura sía más favorable.

–    Consideramos imprescindible abrir la negociación d’un nuevu alcuerdu d’interinidá que garantice la estabilidá del colectivu interín asturianu, un colectivu que sufre la constante rotación nel empléu y que vive nuna continua incertidume tres cada UEP. La rebaremación que se produz tres les oposiciones pue emponer al despidu tres años de serviciu, xenerando una evidente desventaxa en comparanza colos interinos d’otros territorios, qu’en munchos casos gocien d’estabilidá nel empléu. Esta situación nun pue caemos embaxo y nel nuesu sindicatu ye prioritario la defensa de los trabayadores que tuvieron al serviciu de l’Alministración a lo llargo munchos años ensin otra alternativa que la inestabilidá.

Uviéu, 15 de marzu de 2017

Esta entrada tamién se puede consultar en: Castellanu