Home > Aición sindical > Nuevu documentu – El reconocimientu del prof. interín más en xuegu que nunca

Nuevu documentu – El reconocimientu del prof. interín más en xuegu que nunca

140402 concentracion interinos Decretazu01 LA HORA DE LA VERDÁ.
 El reconocimientu del profesoráu interín más en xuegu que nunca.

Güei na nueva mesa sectorial de negociación del alcuerdu d’interinos l’alministración felicitóse pola so capacidá negociadora ensin perder de vista “l’axuste” del alcuerdu a la igualdá, méritu y capacidá. Asina mesmu, fixo mención al afitamientu de cuestiones llaborales del personal interino que nun apaecíen na primer propuesta d’alcuerdu y a la inclusión de beneficiar, dientro de la llegalidá, a quien yá integren les actuales llistes d’interinidá.

L’Alministración considera que s’avera’l momentu de que les organizaciones sindicales s’asitien respect al alcuerdu pa convocar la Mesa Xeneral de la Función Pública que la ratifique. Dende l’Alministración, igualmente alviértese en nome de la llealtá negociadora, que si nun hai alcuerdu va dar en realizar una disposición de calter xeneral na que nun s’incluyirán los conteníos supuestamente avanzaos durante la negociación. Nesti sentíu, aspectos como’l porcentaxe total de la nota d’oposición, los años d’esperiencia necesarios pa llograr el máximu d’esi apartáu o la puntuación por aprobar los dos fases del procesu selectivu camudaríen a peor. Otros aspeutos sobre condiciones llaborales como la mención al pagu del branu quedaríen ensin recoyer.

Dende SUATEA valoramos tou esti procesu negociador como azotáu y que nun tien en cuenta la importancia y trascendencia del alcuerdu pal futuru llaboral del profesoráu interín. El fechu de que se nos plantée que, o se robla esti borrador o lo que l’Alministración diga, suena cuandoquier a coacción.

En SUATEA consideramos que la nueva propuesta de alcuerdu que tenemos sobre la mesa nun supón nenguna meyora pal colectivu d’interinos, por contra, ábrense les puertes a situaciones de desamparu nes que tres años d’actividá docente, en munches ocasiones ensin posibilidá nenguna de sacar una plaza por oposición, un profesor puede vese condergáu al paru.

Nun ye almisible que nengún sindicatu firme condiciones llaborales qu’empioren la situación qu’había enantes. Nesti sentíu, SUATEA sigue esixendo la desvinculación ente la permanencia nes llistes y la presentación a les oposiciones y el valir de la esperiencia docente percima d’otres consideraciones.

Agora, más que nunca faise necesaria una movilización masiva del profesoráu interín pa manifestar el so refugu a estes nueves condiciones impuestes per parte de l’alministración. Por ello convocamos a que se sume a la concentración entamada pa mañana a les 18:30 hores delantre la Xunta Xeneral del Principáu.

¡EL TO FUTURU LLABORAL TA EN XUEGU, MOVILÍZATE!

CONCENTRACIÓN: 2 ABRIL 18:30H DELANTRE LA XUNTA XENERAL DEL PRINCIPÁU

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743