Home > Comunicaos > Nueves midíes sobre la presencialidá del personal docente.

Nueves midíes sobre la presencialidá del personal docente.

Na mañana de güei, 2 de payares, celebróse una xunta d’urxencia ente la Conseyería d’Educación y les organizaciones sindicales presentes na Xunta de Personal.
Nella anunciósenos l’adopción per parte de la Conseyería d’una midida que SUATEA vien reclamando dende l’entamu del cursu: que’l profesoráu permaneza nel centru’l tiempu puramente necesariu pa dar clase, dexando desenvolver el restu de les sos funciones de manera non presencial. Tomada a tiempu, esta midida dexaría iguar los horarios de secundaria de manera más racional, pero la Conseyería amosóse implacable cola presencialidá nos centros a la hora de cumplir les hores d’obligada permanencia, y asina quedó reflexao na Circular d’entamu de cursu.
Agora, cuando la mayoría del personal docente tien xuntes de Departamentu ente clase y clase, o preparación de l’atención semipresencial, etc. encamiéntase la non presencialidá nel centru. Esto supón, na práutica, una desregulación de les condiciones llaborales del profesoráu, porque eses xeres que yá non se faigan nel centru, va haber que recuperales n’otru momentu, al llegar a casa. Trátase d’una midida que sofitemos porque pue favorecer a parte del profesoráu de Secundaria y en Primaria, esta medida permitirá que les hores complementaries puean realizase de forma non presencial, esto ye, fuera del horariu previstu.
Igualmente, aportunemos na necesidá de que s’adopten midíes de prevención pal personal vulnerable, entainando los trámites de valoración de riesgos llaborales, facilitando’l trabayu telemáticu, tramitando les baxes necesaries, o apurriendo los equipos de proteición individual cola frecuencia debida.
Dende SUATEA consideramos que la situación sanitaria empeora y, poro, faise necesario afayar los protocolos y les midíes d’actuación a les nueves circunstancies, empezando por una medría de los recursos. Creemos que ye menester aumentar la distribución de mázcaros a la entrada del centru, tamién ente l’alumnáu, pa garantizar que tean en bones condiciones. Hai qu’adoptar midíes referentes a la ventilación de los centros y midir la concentración de CO2 énte’l peligru que representen los aerosoles. Aportunamos n’otru pidimientu que llevamos faciendo dende l’entamu de les actividaes escolares: crear una comisión informativa sobre la evolución ya impactu de la pandemia nel ámbitu educativu.
Siguimos apostando pola educación presencial y aportunando na necesidá de reforzar la plantiya pa evitar los daños que ta sufriendo la parte d’alumnáu incorporada solamente de manera semipresencial.
A lo último, consideramos que tolos aspeutos rellacionaos coles condiciones llaborales tienen d’encetase en xuntes de Mesa Sectorial. Valoramos positivamente que la Conseyería mos ufierte xuntes informatives, pero creemos que nesti momentu faise pernecesario abrir una Mesa Sectorial pa llegar a alcuerdos que nun manquen les condiciones llaborales nes que’l personal docente realiza esta actividá considerada como esencial.
Uviéu/ Uviéu, 2 de payares 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348