Home > Centros educativos > Non al Profesoráu xubilao trabayando nos centros

Non al Profesoráu xubilao trabayando nos centros

SUATEA REFUGA LA CIRCULAR SOBRO L’EXERCICIU DEL VOLUNTARIÁU DEL PROFESORÁU XUBILAO NOS CENTROS DOCENTES.

La Conseyería d’Educación presentó esta tarde a les OOSS que formamos la Xunta de Personal Docente una propuesta de circular sobro l’exerciciu del voluntariáu nos centros docentes per parte’l profesoráu xubiláu.

Ensin quita-y el méritu a la valiosísima trayectoria y al valor que suponen les conocencies acumulaes pol profesoráu xubiláu, paez cuasi que cafiante que la Conseyería d’Educación plantegue agora un tema que nun mos paez nin muncho menos prioritariu y que xenera grandes duldes al respective del sen que puede llevar col peligru de qu’acabe convirtiéndose nuna puerta a la mano d’obra gratuita. Llevamos años de retayos nos que se reclamó la negociación de la meyora retributiva del profesoráu, la necesidá d’un nuevu Alcuerdu d’interinidá, l’amenorgamientu horariu a mayores de 55 años, la recuperación del horariu anterior a los retayos de 2012 en Secundaria y otros Cuerpos (18 hores lectives), la sobrecarga burocrática que padez el profesoráu y los centros educativos nel so conxuntu, les insuficientes plantiyes docentes en toles etapes educatives, los retayos presupuestarios, esto ye, un suma y sigue que vien demostrar la poca consideranza que tien la Conseyería cola comunidá educativa.

Sicasí, dende SUATEA celebramos qu’esta Conseyería valore la esperiencia, el talentu y el potencial del profesoráu xubilao. Pero, demandamos que siga esti mesmu principiu con tol profesoráu, especialmente’l profesoráu interino, al que se tendría de reconocer el potencial que-y otorga la esperiencia de munchos años y dotalos d’estabilidá col envís de caltener la calidá educativa.

La mayoría de les actividaes que puede desenvolver el profesoráu xubilao nos centros educativos son xeres que correspuenden a trabayadores que tán n’activu. A última hora, la Conseyería, ta entamando mecanismos que nel futuru pueden facilitar el despidu de docentes o, quiciabes, la non contratación del personal necesario pa cubrir eses actividaes.

SUATEA denuncia esta iniciativa, pide la retirada de la circular y encamienta a la Conseyería a entamar d’una vez a recular nos retayos impuestos dende 2012 y que dinamitaron la organización de los centros docentes, les condiciones llaborales del profesoráu y, por ello, la calidá educativa que s’ufierta al alumnáu.

Anunciamos igualmente que, nel casu que la Conseyería anecia nes sos intenciones, SUATEA va actuar con tolos medios al so algame, incluyíos los xurídicos, pa torgar qu’esta iniciativa afecte a los puestos de trabayu, tanto docentes como non docentes dientro de los centros educativos.

Secretariáu de SUATEA. Uviéu, 23 d’ochobre de 2017

Esta entrada tamién se puede consultar en: Castellanu