SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
LA COMUNIDÁ EDUCATIVA ESIXE LA PARALIZACIÓN DE LES EVALUACIONES ESTERNES DE 6u DE PRIMARIA
En rueda de prensa celebrada güei llunes 25 d’abril, el Movimientu Social pola Escuela Pública, FAPAS Xixón, el Sindicatu d’Estudiantes y SUATEA, manifestaron el so refugu a la celebración n’Asturies de les evaluaciones esternes en 6u de Primaria, conocíes como reválides de sestu.
Esiximos coherencia al Conseyeru d’Educación tres les sos crítiques a la LOMCE y a les dures valoraciones sobre esti tipu de pruebes declaraes con anterioridá a los medios. Pensamos que la nuesa Comunidá tendría de sumase al restu de CCAA que nun la llevarán a cabu y denunciar que lo qu’en realidá suponen son una evaluación de los centros y del profesoráu con un enfoque mercantilista, que va llevar al establecimientu de clasificaciones artificiales y rankings con consecuencies que van afectar descomanadamente a la escuela pública.
Tomar decisiones sobre la trayectoria educativa del alumnáu y la identificación de les necesidaes individuales del mesmu solamente puede faese cola conocencia oxetiva y siguida que tienen los y les docentes que-yos dan clase tolos díes.
La propuesta de dexar la realización de les pruebes nun solu día en cuenta de dos, nun ye abondo, nin pa tornar la situación de estrés pola que van pasar neños y neñes de 11 años, nin pa compensar les consecuencies cuando s’establezan les comparances colos resultaos llograos.
Los cuestionarios de contestu que dende’l Ministeriu s’obliga a facer a alumnáu, families y centros, ye un exemplu claru de cómo nun esiste intención de llograr una información oxetiva de les condiciones socioeconómicas y culturales pa la contestualización de los resultaos llograos. Les entrugues, pola so dificultá y falta d’adaptación a les edaes a les que tán dirixíes, pola so suxetividá y pola so tendenciosidá, constitúin evaluaciones tapaes del llabor del profesoráu con una gran ambigüedá nes interpretaciones posteriores que se lleven a cabu.
Les organizaciones presentes anunciamos que, frente a la intención de la Conseyería d’Educación, vamos llevar a cabu movilizaciones a primeros del mes de mayu y vamos facer un llamamientu a les families tanto a participar de les mesmes como a realizar un boicó a les pruebes nun unviando a los fíos y les fíes a escuela’l día de la celebración de les mesmes.
Secretariáu d’Asturies de SUATEA-STEs
Uviéu, 25 d’abril de 2016
Esta entrada está disponible en: Castellano (Castellanu)
