Non a la propuesta calendariu axudicaciones d’entamu’l cursu

SUATEA REFUGA LA PROPUESTA DE CALENDARIU D’AXUDICACIONES D’ENTAMU DE CURSU PRESENTÁU POLA CONSEYERÍA

 Énte la incertidume que xeneró l’espardimientu de la propuesta de la Conseyería respecto al calendariu de pidimientos y axudicaciones d’entamu de cursu, dende SUATEA unviemos a la Conseyería un escritu colos daños ya inconvenientes qu’esti calendariu en dos fases pue provocar nel profesoráu interín afectáu y, amás, unviémos-yos delles propuestes alternatives.

La propuesta de l’Alministración refierse a los siguientes colectivos: profesoráu interín d’especialidaes ensin convocar, profesoráu funcionariu en práctiques y profesoráu interín d’especialidaes convocaes a oposición, y consistiría básicamente n’abrir plazu de pidimientos en xunetu pa les especialidaes ensin convocar a oposición, finales d’agostu pa funcionarios en práctiques y 3-4 de setiembre pa les especialidaes convocaes a oposición. Amás, asumieron el compromisu de que los aspirantes que tean en más d’una llista y que na primer convocatoria nun escueyan vacante d’especialidá ensin convocar van caltener el so puestu y nun van pasar a la fin de la llista.

Dende’l primer momentu, esta Organización Sindical plantegó los problemes que va xenerar esta propuesta de calendariu a los aspirantes que tán en llistes d’especialidaes convocaes y non convocaes a oposición:

– Al plantegar l’axudicación en dos fases, los aspirantes que tán en delles llistes tendrán de decidir na primer fase si escueyen plaza nuna especialidá ensin convocar a oposición, ensin saber a ciencia cierta si tienen posibilidaes d’escoyer una plaza na especialidá convocada a oposición. Lóxicamente, xenera decisiones difíciles: nun escoyer plaza na primer fase a riesgu de quedase ensin trabayu na segunda, escoyer de forma preventiva media xornada o una plaza alloñada de casa de la especialidá cuando podríen optar na segunda fase a una plaza meyor na especialidá convocada. Ello favorecería amás el desplazamientu de persones a especialidaes qu’en principiu nun sedríen la so primer opción y perxudicaría a aspirantes d’estes llistes.

– Caltener el derechu a nun pasar a la fin de la llista pa quien nun escueya vacante na convocatoria d’especialidaes ensin convocar arreglaría dellos desaxustes, pero podría xenerar inseguridá xurídica porque nel Alcuerdu d’interinidá en vigor diz lo contrario: “La non realización de pidimientos per parte de les persones convocaes va suponer la suspensión de posteriores llamamientos hasta’l momentu nel qu’al restu d’integrantes de la llista se los convoque.”

– Les persones que sían axudicaes en setiembre, como nun van tener contratu, nun van poder presentase nos centros del cursu anterior pa realizar esames y evaluaciones de setiembre, lo que pue provocar caos organizativu nos centros, especialmente en departamentos unipersonales, y efectos negativos nel alumnáu, que nun va ser evaluáu pol profesoor o profesora qu’impartió la materia nel cursu.

Somos conscientes de que la propuesta de l’Alministración respuende al curtiu plazu col que se cunten pa,  acabante rematar los procesos selectivos, xestionar la entrega de documentación, baremar, publicar llistes provisionales, plazu de reclamaciones, llistes definitives, etc. Agora bien, entendemos que ye menester buscar soluciones qu’en nengún casu frayen los derechos de les persones afectaes. Por too ello, dende SUATEA propunximos que se faiga coincidir el calendariu de pidimientos y axudicaciones de les especialidaes convocaes y non convocaes, anque  se faiga a finales d’agostu y anque que la incorporación a los  nuevos destinos se retrase más allá del 1 de setiembre. Pa ello, proponemos una prórroga del contratu actual nos díes necesarios pa realizar esames y evaluaciones de setiembre. Esto tendría delles ventayes:

– La prórroga de contratu nun supondría mayor costu económicu.

– Les evaluaciones de setiembre realizaríales el profesoráu qu’impartió la materia nel cursu.

– La mayor parte del profesoráu incorporaríase al nuevu destín hacia’l día 8 setiembre, igual qu’en cursos anteriores.

– Tolos aspirantes podríen escoyer ensin torgues toles vacantes nuna única fase d’axudicación  y evitaríense tolos desaxustes enantes citaos.

El Secretariáu de SUATEA

N’Uviéu a 11 de mayu de 2018